Avokatja e ish-bosit të grupit mafioz Cosa Nostra, ka kërkuar zbutjen e masës së sigurisë për Matteo Messina Denaron me pretekstin se nuk është në gjendje të mirë shëndetësore.
Lorenza Guttadauro, mbesa njëkohësisht edhe avokatja e Denaros u shpreh se ai nuk po merr trajtimin e duhur në burg për kancerin në zorrën e trashë.
“Trajtimi në burg nuk krahasohet me mjekimet jashtë! Nuk e di nëse po e trajtojnë mirë” – ka thënë avokatja e Denaros në seancën gjyqësore.
Por sipas mediave italiane, mjekët e burgut të L’Aquila tregojnë se gjendja shëndetësore e Denaros është e mirë, teksa po ndjek rregullisht seancat e kimioterapisë në një klinikë shëndetësore brenda burgut.
Dy ditë më parë, në seancën gjyqësore, Prokurori Maurizio De Lucia thotë se gjendja fizike e Denaros është e qëndrueshme.
Edhe pas arrestimit të tij në muajin janar, mjekja e klinikës ku kurohej Denaro është shprehur se ai ka shumë pak kohë për të jetuar. Mjekja Alessia Randazzo i ka kërkuar Denaros që të rrëfejë krimet e tij.
Përballja me prokurorët
Pas arrestimit të tij, Denaro duket se nuk i ka bërë rezistencë pyetjeve të prokurorëve. Sipas mediave italiane, ai i është përgjigjur të gjitha pyetjeve të drejtuara, por ato nuk përbënin asnjë interes për hetimet që kanë nisur ndaj ish-shefit të Cosa Nostras.
Madje procesverbalin e hartuar për këtë seancë pyetjesh nuk e kanë përfshirë as në dosjen hetimore, pasi sipas tyre, nuk kishte asnjë informacion të rëndësishëm.