Bota i ka thënë jo luftës në Ukrainë. Në OKB, 143 vende kanë votuar rezolutën që dënon sulmin rus ndaj Ukrainës, të filluar në shkurtin e këtij viti, dhe veçanërisht vendimin e Moskës për të aneksuar provincat ukrainase ku u zhvilluan referendumet, Luhansk, Donetsk, Zaporizhzhia dhe Kherson.
Ndërkohë, votimi tregoi qartë edhe vendet e pakta, por jo pa peshë, që mbështesin ose të paktën nuk i kanë kthyer shpinën Moskës.
Ishin 35 vende që abstenuan, duke përfshirë këtu Kinën, Indinë dhe Afrikën e Jugut, ndërkohë që vetëm 4 vende votuan kundër, Bjellorusia tashmë aleat zyrtar i Kremlinit, Koreja e Veriut, Siria që mbahet me ndihmën e trupave ruse dhe Nikaragua.
Rezoluta i bën thirrje komunitetit ndërkombëtar të mos njohë asnjë nga pretendimet e aneksimit të Rusisë dhe kërkon “zhbërjen e menjëhershme të saj”. Rezoluta mirëpret dhe “shpreh mbështetje të fortë” për përpjekjet për të de-përshkallëzuar konfliktin përmes negociatave.
Javën e kaluar, në një ceremoni madhështore në Kremlin, Presidenti Vladimir Putin nënshkroi dokumentin për t’i bërë rajonet lindore të Ukrainës Luhansk, Donetsk, Zaporizhzhia dhe Kherson pjesë të Rusisë.