“Futbolli nuk është biznes, është pasion dhe pasionet nuk kanë çmim”, ishte përgjigjja e Masimo Moratit mbi çmimin që ka paguar për të blerë Interin në 1995-ën.
E ndërsa flitet për pasionet, ish-presidenti zikaltër është ndalur te një temë shumë e ndjeshme për çdo tifoz të Interit dhe jo vetëm: “Calciopoli”-n.
“A vlen për mua titulli i 2006-ës? Sigurisht që po. E di që tifozët e Juventusit acarohen dhe kjo më shtyn ta pohoj edhe me më shumë bindje.
Ai titull ishte dëmshpërblimi minimal për të gjitha padrejtësitë që na ndodhën, madje do të prisja shumë më shumë”, tha Morati, që më pas u ndal edhe te raporti me Luçiano Moxhin, atëherë drejtues i bardhezinjve.
“Është e vërtetë që Moxhi ka dashur të vijë tek Interi dhe unë nuk i kam thënë asnjëherë direkt që nuk e doja, por nuk do ta kisha pranuar asnjëherë të vinte.
Kjo sepse Seria A ishte e manipuluar dhe ne ishim viktimat. Duhet të fitonte Juventusi dhe nëse nuk fitonin ata, atëherë duhet të fitonte Milani.
Ishte një turp sepse mendoj se forma më e lartë e pandershmërisë është të luash me ndjenjat e njerëzve dhe është kjo ajo që bënë me tifozët”, e përfundoi fjalën ish-presidenti i Interit, duke risjellë edhe një herë në vëmendje titullin e 2006-ës i fituar nga Juventusi, por që pas skandalit të trukimeve “Calciopoli” i kaloi Interit.