Detaje të reja janë mësuar në lidhje me mega-operacionin e zhvilluar mes policisë spanjolle, shqiptare dhe asaj gjermane para pak kohësh në Spanjë ku u arrestuan 107 persona. Bilanci i përgjithshëm i hetimit, që zgjati më shumë se një vit, arrin në 107 persona të ndaluar dhe 51 prona të regjistruara në të cilat janë çmontuar rreth tridhjetë plantacione të brendshme të marihuanës, përveç ndërprerjes së të tjerëve në fazën e montimit. Sipas “ReportTv” kreu i bandës shqiptare që merrej me kultivimin e drogës është Stefan Currin, me origjinë nga Puka, i cili është arrestuar gjatë operacionit që u zhvillua më 13 korrik.
Sipas hetimeve Curri me lidhjet e tij rekrutonte ushtarë kryesisht nga zona Pukë dhe Mirditë u paguante avionin duke i ftuar si turist dhe ktheheshin në punëtorë e roje. Grupi kriminal besohet të ketë qenë duke menaxhuar plantacionet e kanabisit në Spanjë ku ata kultivonin dhe përpunonin marihuanën, para se të transferohej në vende të tjera evropiane për shpërndarje të mëtejshme. Ky grup kriminal i organizuar me bazë klani ishte i strukturuar në mënyrë hierarkike, me degë që vepronin ndërkombëtarisht. Disa nga anëtarët e saj të arrestuar kanë një histori të trafikut të drogës në vende të ndryshme. Kriminelët po devijonin furnizimin me energji elektrike për të kultivuar ilegalisht bimët në ambiente të mbyllura. Ishte vlerësuar se energjia elektrike e vjedhur arrin në mbi 1.6 milion € në të ardhura të humbura të shërbimeve.