Antonio Konte shpreson që Kris tiano Ronaldo të vazhdojë formën e tij të qetë përpara porte edhe sot kundër Totenhemi të vizitojë “Old Trafford”. Sulmuesi portugez nuk po bën një sezon në standardet e tij të zakonshme, ndërsa ka shënuar vetëm 2 gola në 12 ndeshje për Mançester Junajtidin në të gjitha kompeticionet.
37- vjeçari nuk është një zgjedhje e parë për sulmin e Erik ten Hagut. Por 5 herë fituesi i “Topit të Artë” shënoi një gol spektakolar ndaj “Spërsave” në Londër sezonin e shkuar, duke i ndihmuar “Djajtë” të fitonin 3-0. Ai rezultat solli shkarkimin e Nuno Espirito Santos.
Totenhemi vuajti një humbje 3- 2 në “Old Trafford” më pas falë tripletës së CR7-ës. Duke folur në konferencën e djeshme, tekniku italian këmbënguli se ishte Ronaldo ai që e mundi skuadrën e tij në përballjen e fundit dhe jo Junajtid.
“Sezonin e shkuar ai shënoi një tregolësh kundër nesh. Po flasim për një lojtar të pabesueshëm, një futbollist klasi. Po flasim për një lojtar, i cili vazhdon të bëjë diferencën për skuadrën në të cilën luan. Unë e admiroj shumë Kristianon për profesionalizmin e tij, por shpresoj që të qëndrojë urtë, jo si sezonin e shkuar, kur ai shënoi tre gola. Ne humbëm 3-2, por na mundi ai jo Junajtid. Më kujtohet shumë mirë, sepse luajtëm një ndeshje shumë të mirë”.
RIÇARLISON OK – Konte konfirmoi se sulmuesi Riçarlison, i cili pësoi një tërheqje muskulore në kofshë në ndeshjen e fundit kundër Evertonit, nuk ka asgjë serioze dhe nuk do ta humbasë Botërorin me Brazilin.
“Jo, absolutisht jo. Mund t’ua konfirmoj këtë. Lojtari nuk rrezikon për të mos luajtur në Kupën e Botës. Është i dëmtuar, por nuk është shumë serioze. Do t’i duhet pak kohë për t’u rikuperuar. Shpresoj që të luaj edhe ndeshje të tjera për ne përpara Botërorit. Jam shumë i gëzuar për të, sepse Kupa e Botës është ëndrra e çdo futbollisti”.