Djali i humoristit Ismet Drishti, është marë i pandehur nga prokuroria e Tiranës, pasi ka dhunuar dy nga efektivët e skuadrës “Shqiponja” në Tiranë.
Agim Drishti, akuzohet nga prokurori Durim Nushi, se gjatë natës së 3 dhjetorit 2021, ka kundërshtuar dhe goditur fizikisht, dy nga efektivët e policisë së Shtetit.
Sipas dosjes hetimore që tashmë ka shkuar në gjykatë dhe që pritet të fillojë gjykimi, Agim Drishti, paraqitet në materialin e prokurorisë si një person i alkoolizuar dhe nën efektin e lëndëve narkotike.
Në dosjen hetimore që flet për arrestimin dhe më pas lirimin e Drishtit nga gjyqtari Altin Abdiu, jepet një dinamikë e plotë se si ka ndodhur dhunimi i policëve nga Drishti, por dhe e kaluara e tij kriminale.
Sipas dokumentave të siguruara, nga redaksia, Drishti rezulton i dënuar më parë për drogë.
Ndërsa nga të dhënat e policisë së Shtetit del se djali i humoristit,Shkodran, është një person konfliktual dhe tepër problematik. Kjo pasi rezulton i shoqëruar, plot 11 herë nga viti 2012 e në vijim. Disa persona kanë depozituar kallëzim penal në polici ndaj Drishtit, por sërisht policia dhe Drejtësia janë treguar të buta me këtë individ.
Rasti i fundit ku është depozituar kallëzim penal kundër. Agim Drishtit, kanë qënë 4 punonjës të policisë së Tiranës, të cilët shërbejnë në skuadrën “Shqiponja”.
Policët, Ornel Zholaj, Arjan Mara, Mihal Labi, dhe Xhuljano Ibrahimaj, kanë treguar se në 3 dhjetor 2021 ata kanë marrë shërbimin, turni i tretë nga ora 22:00 e datës 3 dhjetor 2021 deri në orën 06:00 të datës 4 dhjetor 2021, të planizuar autopatrullë me katër punonjës, me mjetin furgon me targë MB 588 AA.
Duke patrulluar në sektorin që kishin në mbulim, rreth orës 01:00 të mesnatës, nëpër rrugicat në zonën e “Myslym Shyrit”, në errësirë, kanë konstatuar disa persona që po lëviznin në këmbë. I kanë ndaluar dhe ju kanë kërkuar të identifikohen.
Të gjithë personat përveç njërit, kanë nxjerrë dokumentat dhe janë identifikuar pa probleme sikur rezultoi dhe nga identifikimi te salla operative. Përveç njërit prej tyre, që nuk e kishte me vete dokumentin e identifkimit dhe ishte edhe në gjëndje të papërgjegjëshme.
Biles ka filluar të acarohet me efektivët e policisë, fillimisht me fjalë dhe kur i kanë kërkuar se do e kontrollonin për ndonjë send të paligjshëm. Ky person të cilin fillimisht nuk e kanë identifikuar dot apo ta njihnin, ka filluar ti kundërshtojë me forcë efektivet duke i shtyrë dhe kur policet i kanë bërë me dije se do e shoqeronin në Komisariatin më të afërt për të bërë të mundur identifikimin e tij, pasi po i kundështonte me forcë në kryerjen e detyrës së tyre.
Agim Drishti djali i Ismet Drishtit.
Agim Drishti, në atë moment është acaruar dhe ka filluar ti godasë me grushta dhe shkelma në trup dhe me shkelma nga këmbët policët, më tepër efektivët Ibrahimaj dhe Labi.
Kurse policët e tjerë, i ka goditur me grushta dhe bërryla në trup. Për shkak se policët kanë qënë të shumtë në numër, e kanë bllokuar dhe nuk e kanë lënë ti dëmtonte më tepër, por i kanë vendosur prangat dhe e kanë transportuar në Komisariatin e Policisë Nr.2.
Në Komisariat për këtë person, që policët kanë menduar se ka qënë nën efektin e lëndëve narkotike apo alkoolike, ata kanë marë informacion se ishte Agim Drishti.
Nga verifikimi në sistemin ADAM të informacionit policor, rezulton se nga viti 2012 e deri në ditën e sotme, Agim Drishti, është shoqëruar plot 11 herë nga policia kriminale. Madje në një rast në 2013 ai është dënuar për drogë nga Gjykata e Tiranës.
Pavarësisht faktit se Drishti ka precendetë të mëparshëm penalë dhe së fundi ka dhunuar dhe punonjësit e policisë “Shqiponja”, ai u la i lirë nga gjyqtari Altin Abdiu, edhe pse prokuroria kërkoi masën e “arrestit në burg”.
Pritet që tashmë, në gjykatën e Tiranës tëg fillojë procesi gjyqësor kundër, Agim Drishtit, ku përfaqësuesi i akuzës do kërkojë dënimin e tij.