Tre vjet nga zbatimi i ligjit të Vetingut, është sfidë e vështirë të gjesh sot në drejtësi një gjyqtare të skeduar me kaq shumë skandale dhe afera sa Fida Osmani, e kapur disa herë duke falsifikuar vendime gjyqësore.
Është gjyqtarja e damkosur nga KLD-ja me masë disiplinore sepse bënte gjyqet ne avion dhe jashtë shtetit, madje merrte edhe vendime sikur të ishte në sallën e gjyqit.
Duhej shkarkuar dhe marrë e pandehur për falsifikim procesverbalesh, papërgjegjshmëri, dhunim të të drejtave të palëve në proces dhe denigrim të figurës së gjyqtarëve, por sot Fida Osmani vijon të japë ‘drejtësi’ me çekiçin KÇK.
Për gjyqtaren e Tiranës ka disa denoncime me prova ulëritëse në Inspektoratin e Lartë të Drejtësisë, por ky institucion vijon të mos veprojë, duke thyer besimin e publikut.
Ndërsa Fida Osmani vijon të marrë vendime skandaloze deri kur t’i ngushtohet laku i Vetingut, bashkëshorti i saj sillet rreth gjykatave, nëpër lokale.
Bëhet fjalë për Kujtim Osmanin, njohës i kanaleve të errëta të sistemit të korruptuar të drejtësisë që po shembet nga Vetingu.
Kujtim Osmani ka qenë Sekretar i Përgjithshëm në Gjykatën Kushtetuese deri në vitin 2018 kur doli në pension. Ndoshta ky pozicion e ka ndihmuar Fida Osmanin t’i shpëtonte shkarkimit në shtator të vitit 2012, kur KLD-ja e Bujar Nishanit dhe Eduard Halimit e thirri për të dhënë llogari se si ka mundësi që i zhvillonte gjyqet në një kohë kur ishte në avion.
Fida artikuloi disa justifikime qesharake dhe denigruese për figurën e gjyqtarit. Gjyqtarja implikoi në atë kohë edhe bashkëshortin e saj, Kujtim Osmanin, në skandalin e zhvillimit të gjyqeve në ajër.
Duke u tallur me ish-KLD-në e degraduar, Fida Osmani tha se burri i saj shkonte më përpara dhe kalonte pasaportën e vet dhe të saj në sistemin TIMS, që të mos vonoheshin. Më pas, kjo mbaronte gjyqin dhe nisej si ‘Spiderman’ për të kapur avionin.
Me këtë alibi qesharake, ajo implikoi edhe Kujtim Osmanin, pasi pasaporta nuk mund të kontrollohet në aeroport vetëm nëse burri i saj ka arritur të korruptojë kontrollin.
Prokuroria çuditërisht nuk u investua për të hetuar këtë çështje, ku doli në pah shpërdorimi i detyrës, falsifikimi i procesverbaleve të seancave gjyqësore etj.
Sot, Fida Osmani tund çekiçin në sallat e gjyqit duke marrë vendime skandaloze, ndërsa Kujtimi sillet rreth gjykatave.
Vajzës i kanë gjetur një vend pune, duke vegjetuar në Kuvendin e Shqipërisë, sapo mbaroi shkollën, duke i bërë dhuratë edhe një makinë Volsvagen.
Të birit i kanë blerë shtëpi dhe makina. Në vitin 2005, të birit i blen një makinë me vlerë 500 mijë lekë.
Me kalimin e viteve makinave u bie vlera, por kjo nuk ndodh në rastin e gjyqtarëve që pastrojnë para. Në vitin 2007, i biri e shet makinën për 9 mijë euro,
Fida Osmani ka deklaruar në letrat e firmosura me dorën e saj, një apartament 3+1, dy banesa private në Peshkopi, apartament 3+1, por nuk kuptohet nëse është e njëjta pasuri e deklaruar në 2003 apo është tjetër pasuri, megjithëse vlera e tyre ndryshon.
Gjyqtarja deklaron edhe apartament 1+1 në emër të djalit në Durrës. Në vitin 2010 deklaron se ka blerë zyra, por jo vlerën e tyre. Në 2017, deklaron edhe blerjen e një apartamenti 95.60 m2, në Tiranë me vlerë mbi 90 mijë euro. Në vitin 2018, nuk dihet se nga ka mbirë edhe një lokal, pasi deklaron të ardhura nga lokali me qira.