Nuk dua qelbësira në skuadër” është slogani i “All Blacks”, skuadrës simbol të regbisë botëror dhe së shpejti do të jetë edhe për kombëtaren e Luçiano Spaletit.
“Jo qelbësira” është edhe titulli i librit shumë të shitur të Xhejms Kerrit, që trajneri italian tha se donte t’ua dhuronte lojtarëve të tij për Krishtlindje: jo një libër i thjeshtë mbi regbinë, por një manual i vërtetë për arritjen e objektivave, për motivimin, për udhëheqjen, i përdorur nga shumë kompani si një udhërrëfyes për të përmirësuar veten dhe të gjithë ata që punojnë brenda tyre.
Në fund të fundit, autori, eksperti i menaxhimit të biznesit Xhejms Kerr, ka punuar si trajner për forcat speciale amerikane dhe britanike, për kompanitë “Google” dhe “Red Bull”, për shumë ekipe të Formula 1 dhe për ekipet e Kupës së Amerikës.
PASTRIMI I DHOMAVE TË ZHVESHJES – Libri gërmon thellë, deri në pjesët më të fshehura të universit “All Blacks” dhe tregon për një botë që në një farë mënyre duket vite dritë larg: lojtarët, veçanërisht ata më të moshuarit (sepse shembulli gjithmonë nis prej tyre) në fund në çdo ndeshjeje armatosen me fshesa dhe pastrojnë dhomat e zhveshjes, sepse askush tjetër nuk duhet ta bëjë këtë.
“Sepse askush nuk kujdeset për ‘All Blacks’, ‘All Blacks’ kujdesen për veten e tyre”, shkruan Kerr në librin e tij. Mesazhi i librit është i qartë: nuk ka asnjë “unë” që mund të vendoset mbi ekipin, dhe në të njëjtën kohë çdo individ është përgjegjës për të mirën e grupit, dhe ky është mesazhi që Spaleti dëshiron t’i përcjellë djemve të tij.
PËRULËSI DHE DISIPLINË – “Një grup individësh të aftë, por të padisiplinuar mund të dështojnë. Karakteri triumfon mbi talentin”: kjo është një nga frazat kryesore në librin e Xhejms Kerrit, por edhe vetë Spaleti mund ta kishte thënë lehtësisht një gjë të tillë. Trajneri kërkoi përkushtim, seriozitet dhe përulësi, përkushtim total ndaj kauzës dhe mbi të gjitha jo qëndrime sipërfaqësore: “Kush nuk lufton me dëshirë, nuk do të ketë më mundësi të ekzistojë në futboll, të paktën jo me mua”, tha gjatë grumbullimit në Koverçiano.
Shembulli i “All Blacks” është i qartë: ata kanë pasur shumë momente krize dhe vetëm falë këtij mentaliteti kanë dalë të pacenuar dhe më të fortë