Olivie Zhiru po përjeton një rini të dytë në Milano dhe me siguri që nuk do ta ndalë një skualifikim si ai që e detyron të mungojë sot.
Siç shkruan “Corriere della Sera”, pavarësisht 36 viteve, francezi vazhdon të shënojë gola të rëndë, si ai i së shtunës ndaj Specias.
Lidershipi i tij brenda dhe jashtë fushës është një vlerë e shtuar për ekipin, me Maldinin që tashmë ka gati rinovimin e kontratës për të.
Akordi aktual skadon në qershor dhe do të zgjatet edhe për një vit. Thuhet madje se mes palëve ka një marrëveshje mbi bazën e 3.5 milionë eurove, po aq sa rroga aktuale e Zhirusë.
Shifrat janë në anën e tij: tashmë 9 gola në 18 ndeshje sezonale, teksa ishte pikërisht bomberi që mori përdore skuadrën në rrugëtimin e titullit kampion gjatë sezonit të kaluar.