Policia në Filipine ka akuzuar kreun e shërbimit të burgjeve të vendit se ka urdhëruar vrasjen e një gazetari të njohur radiofonik.
Percival Mabasa, 63 vjeç, u qëllua për vdekje muajin e kaluar teksa po shkonte me makinë në studion e tij të radios në një periferi në Manila.
Ai kishte publikuar akuza për korrupsion kundër drejtorit të përgjithshëm Gerald Bantag, thanë zyrtarët.
Mabasa ishte gjithashtu një kritik i hapur i ish-presidentit Rodrigo Duterte.
Bantag, i cili aktualisht është i pezulluar nga detyra, “do të jetë një nga zyrtarët më të lartë në botë të akuzuar ndonjëherë për një rast të kësaj shkalle”, tha prokurori Crispin Remulla, sipas një raporti të AFP.
Policia ka bërë gjithashtu një kallëzim për vrasje kundër zëvendës oficerit të tij të sigurisë Ricardo Zulueta.
Autori i dyshuar, Joel Escorial, iu dorëzua autoriteteve në fillim të tetorit pasi imazhi i tij u kap nga pamjet e sigurisë.
Bantag dhe Zulueta janë akuzuar gjithashtu se kanë urdhëruar vrasjen e një të burgosuri tjetër, i cili dyshohet se i ka transmetuar Joel Escorial urdhrin për ekzekutimin e gazetarit.
Bantag, i cili ishte punësuar nga ish-presidenti Rodrigo Duterte, ka deklaruar se nuk kishte asnjë lidhje me vrasjen.
Do të jetë në dorën e prokurorëve në departamentin e drejtësisë që të vendosin nëse ka prova të mjaftueshme për të ngritur akuza në gjykatë.
Mabasa, i cili njihej me pseudonimin Percy Lapid në emisionin e tij në radio, u vra më 3 tetor. Ai gazetari i dytë që vritet që kur presidenti aktual Ferdinand Marcos Jr mori detyrën.