Në Lindjen e Mesme Lautaro buzëqesh gjithmonë. Ai është “mbreti” në këto gjerësi gjeografike, ku në vitin 2022 fitoi Kupën e Botës me Argjentinën në finalen në Doha, por triumfoi edhe në dy finalet e Superkupës së Italisë të luajtura në Riad: vitin e kaluar kundër Milanit (3-0) dhe atë kundër Napolit (1-0).
“Demi” e ngriti trofeun për herë të parë me shiritin e kapitenit dhe goli i tij në minutën e 91-të, përveç trofeut, e lejoi sulmuesin të arrijë Kristian Vierin në vendin e nëntë në renditjen e golashënuesve më të mirë të Interit me 123 gola. Ikardi dhe vendi i tetë janë vetëm një hap larg.
KRENAR – Lautaro ka arritur 21 gola sezonalë deri më tani dhe nëse vazhdon kështu nuk do të jetë e vështirë të thyejë rekordin e tij personal, atë të një viti më parë me 28 gola në sezon. jo vetëm kaq, por 26-vjeçari është në ndjekje të “Këpucës së Artë” të kampionatit me 18 gola të shënuar dhe duket tashmë në rrugën e duhur, pasi i dyti është Vlahoviç me 11 gola. Gjithsesi, ende larg duket rekordi i Imobiles dhe Higuainit që kanë arritur të shënojnë nga 36 gola në një sezon të Serisë A dhe ndërsa janë luajtur 20 javë për Interin (ka një ndeshje më pak se rivalët), argjentinasi shpreson që mesatarja të jetë ajo e një goli për ndeshje për të barazuar dy bomberët. Për t’iu kthyer golit që e barazoi me Vierin, kapiteni zikaltër festoi duke hequr fanellën dhe vrapuar nën sektorin e pushtuar nga tifozët e “Curva Nord”. “Nuk doja të hiqja fanellën për të shmangur kartonin e verdhë, por më pas ishte emocioni… Ishte një moment unik dhe nuk mund të rezistoja” u shpreh pas ndeshjes, një emocion i kuptueshëm edhe për lidhjen që ka treguar gjithmonë me fanellën.
RINOVIMI – E për të treguar lidhjen me fanellën, Lautaro pritet të firmosë rinovimin me zikaltrit, një rinovim deri në 2028-ën dhe me një pagë deri në 7 milionë euro. Mungojnë vetëm detajet përfundimtare dhe sipas asaj që raporton “Sky Sport”, klubi synon të shpallë vazhdimin e kontratës së kapitenit në periferi të ndeshjes kundër Juventusit më 4 shkurt. Menjëherë para ose menjëherë pas, Lautaro do të nënshkruajë rinovimin dhe do të bëhet më i paguari në skuadrën e Interit.