Ukraina ka nënshkruar një marrëveshje paqeje me vendet e Azisë Juglindore. Edhe pse është një akt simbolik, nënshkrimi vjen në një kohë kur Kievi po përpiqet të forcojë mbështetjen ndërkombëtare në izolimin e Rusisë, por edhe në një kohë kur u njoftua se rusët po tërhiqeshin nga Khersoni, zonë që konsiderohej vendimtare në drejtimin e luftës në Ukrainë.
Ministri i Jashtëm ukrainas Dmytro Kuleba nënshkroi “Traktatin e Miqësisë dhe Bashkëpunimit në Azinë Juglindore” në kuadër të samitit vjetor të Shoqatës së Kombeve të Azisë Juglindore të mbajtur në Phnom Penh.
Samiti i ASEAN-it pasohet nga samiti i G20-s në Bali dhe më pas Forumi i Bashkëpunimit Ekonomik Azi-Paqësor në Bangkok. Të tre samitet po zhvillohen në një kohë kur, sipas AP, Rusia po kërkon tregje të reja për produktet e saj energjetike në mënyrë që të shmangë sanksionet perëndimore pas pushtimit të Ukrainës.