Dushan Vlahoviç është një luftëtar i lindur dhe këtë vazhdon ta tregojë çdo ditë që kalon me bluzën bardhezi mbi shpatulla.
Ndërsa vazhdon që të kërkojë të ndihmojë Juventusin të dalë nga ky moment i vështirë, serbi në të njëjtën kohë nuk ka ndërmend që të braktisë skuadrën, pas problemit që ndjeu në kofshë, gjatë humbjes 4-3 me Benfikën, ku kërkoi zëvendësimin. 22-vjeçari iu nënshtrua dje vizitave mjekësore, të cilat larguan çdo dyshim mbi një dëmtim apo tërheqje të mundshme.
Për Vlahoviçin ka qenë vetëm një lodhje muskulore, duke parë se si rrjedhojë e Botërorit të Katarit të gjithë klubet në Europë po luajnë çdo tri ditë pa pushim.
Sigurisht që edhe numri 9 i “Zonjës së Vjetër” do ta meritonte që të pushonte pak për të rikarikuar bateritë dhe trajneri Masimiliano Alegri po e mendon këtë që ta bëjë kundër Leçes, për të mos rrezikuar më kot Dushanin.
Por siç raporton media torineze, pasi Vlahoviç ka mësuar se nuk ka asnjë dëmtim, i ka kërkuar trajnerit të tij që të mos e kursejë, në pritje të Interit, fundjavën e ardhshme.
“DV9” kërkon që të jetë në fushë edhe ndaj Leçes, për të ndihmuar Juven për të fituar dhe përmirësuar renditjen delikate aktuale.