Pak kush ka dyshime që Arabia Saudite do të marrë nga FIFA organizimin e Botërorit 2034. Vendimi i fundit i saj për të zhvilluar aktivitetin e vitit 2030 njëkohësisht në Amerikën e Jugut, Europë dhe Afrikë praktikisht i hapi rrugën vendit saudit që të hedhë kandidaturën thuajse i pashqetësuar për organizimin e këtij evenimenti me “letrën e interesit” që është dorëzuar zyrtarisht sot. Thuajse i pashqetësuar, pasi në fakt Europa është kundër.
Jo federatat, të cilat rrallëherë dalin kundër FIFA-s apo UEFA-s, por futbolli europian në nivel klubesh, trajnerësh e sidomos futbollistësh që janë pjesë e tyre. Sipas “AS”, shkak bëhet periudha kur pritet të zhvillohet aktiviteti.
Duke pasur parasysh se në Arabinë Saudite temperaturat janë edhe më të larta se në Katar, është e qartë që për të organizuar turneun, do të duhet që ai të zhvendoset përsëri në nëntor-dhjetor, siç ndodhi në vitin 2022. Dhe kjo praktikisht ka shkatërruar sistemin e futbollit në Europë, duke ndryshuar ligat, por edhe duke dëmtuar lojtarët të cilët panë se si u ngjesh kalendari në mënyrë të pazakontë duke shfaqur probleme fizike që i trashëguan edhe në sezonet pasardhëse.
Një situatë e cila mund të bëjë që klubet t’i kundërvihen FIFA-s në momentin kur kjo e fundit të shpallë fitoren e Arabisë Saudite në garën për të organizuar turneun. Gjithmonë nëse FIFA nuk u garanton klubeve pagesa më të majme, siç bëri në rastin e Katar 2022 për këtë “shqetësim”. Për tifozët e pakënaqur, padyshim që nuk mendon askush…