Markus Turam është përfshirë në nëntë gola në këtë edicion të Serisë A falë pesë pasimeve fituese edhe katër topash të dërguar në rrjetë. Asnjë lojtar në historinë e Interit nuk ka arritur të bëjë më mirë në 10 ndeshjet e para si zikaltër, që kur këto të dhëna mblidhen nga Opta (sezoni 2004-’05). Vetë protagonisti i fitores së skuadrës së Inzagit ka folur për mediat pas sfidës.
Jeni gjithmonë më të rëndësishëm. E prisnit këtë ndikim?
Jo, por përpiqem të bëj më të mirën. Mundohem të punoj çdo ditë në stërvitje dhe të ndihmoj skuadrën. Dëshira është gjithmonë e madhe për të lënë gjurmë, por për sa kohë fiton Interi, jam i lumtur.
E prisnit të ishit kaq vendimtar menjëherë?
Erdha tek Interi dhe e dija se do të kishte pritshmëri. Punova shumë dhe fola me shokët e skuadrës. Shënoj gola dhe asistoj, por e rëndësishme është që skuadra të fitojë. Interi po fiton dhe unë jam i lumtur.
Ishte thelbësore të fitonit për renditje. Sa në formë jeni?
Është gjithmonë e rëndësishme të fitojmë në shtëpi para tifozëve tanë. Ndaj Romës morëm tri pikët dhe jemi shumë të lumtur, sidomos për mënyrën se si po shkonte ndeshja e pas aq shumë rasteve ku nuk po arrinim të ishim të saktë.
Në mbrëmjen e Lukakut, ishit ju që vendosët.
Për shumë tifozë të Interit po mbyllet një cikël, nuk fokusohem në këto gjëra, donim dhe morëm tri pikët, siç e kishim menduar. Kam shënuar dhe jam i lumtur, gjëra të tjera nuk më interesojnë e as që dua të përfshihem.
Çfarë ndodhi mes jush dhe Kristantes në fund të ndeshjes?
Gjërat e fushës qëndrojnë në fushë, tani jemi larguar prej aty dhe nuk ka rëndësi. Më mirë të shijojmë fitoren.
Si ishte festa nën tribunën e ultrasve?
Duket se ju pëlqeu. Ashtu si me Benfikën apo Torinon, shumë e bukur. Është gjithmonë kënaqësi të shënosh një gol, veçanërisht në shtëpi dhe para tifozëve. Çdo ndeshje në “San Siro” është e veçantë, jam shumë i lumtur që shënoj në këtë stadium e kudo tjetër me fanellën e Interit.