Në një ditë të vrullshme për shkak të lajmeve mbi pagesat e Barcelonës për gjyqtarët, trajneri Çavi e ka pasur mendjen diku tjetër. Katalanasit do të zbresin sonte në mbrëmje në fushë në ndeshjen e vajtjes në “play off” në Ligën e Europës përballë Mançester Junajtidit. Çavi ka komentuar edhe çështjen e pagesave, duke u munduar të driblojë këtë temë dhe u fokusuar vetëm te futbolli i luajtur.NDESHJA – “Është një ndeshje e kalibrit botëror, spektakolare për tifozët. Mbërrijmë të dyja skuadrat në këtë takim në momentin më të mirë të sezonit, në formë të mirë dhe rezultate shumë të mira. Ten Hag ka ndryshuar rrënjësisht Junajtidin. Do të përballemi me një klub të madh. Pres një ndeshje me ritëm, intensitet. Duhet të tregojmë se jemi në gjendje të garojmë denjësisht në Europë”.
PËRBALLJE CHAMPIONS-i – “Mund edhe të jetë kështu, por në fakt luajmë në Ligën e Europës. Do të jetë një ndeshje e një niveli mjaft të lartë”.
KUALIFIKIMI – “Nuk mendoj se do të vendoset në Barcelonë. Jam i bindur se gjithçka do të vendoset javën e ardhshme në ‘Old Trafford’. Por ne duam të bëjmë një rezultat të mirë në fushën tonë për të parë më pas se çfarë do të ndodhë në Angli”.
LIGA E EUROPËS – “Ky nuk është një kompeticion i thjeshtë. E kemi parë edhe në sezonin e kaluar. Mjaftoni të shihni listën e skuadrave që ndodhen në garë në këtë aktivitet për të kuptuar se nuk do të jetë aspak e lehtë”.
GABIMET E SË SHKUARËS – “Vazhdoj të ndiej mëri kur dëgjoj himnin e Ligës së Kampioneve dhe e shohim vetëm në TV. Por tani është koha t’i përkushtohemi Ligës së Evropës me objektivin për ta fituar atë”.