Sasuolo do të përballet sot me Napolin në shtëpi. Një ndeshje e vështirë për skuadrën e Nedim Bajramit, duke qenë se ekipi i Spaletit kryeson Serinë A. Në këtë ndeshje mesfushori i Kombëtares shqiptare do ta nisë titullar, kjo për faktin se Domeniko Berardi është i dëmtuar dhe trajneri Dionisi e ka gati zëvendësuesin.Në ndeshjen e fundit përballë Udinezes, lojtari italian u dëmtua dhe la fushën e lojës që në fillim dhe aty u aktivizua Bajrami, që mesa duket do të jetë titullar në vazhdim për Sasuolon.
Në ndeshjen e fundit ai u bë protagonist, teksa nga krosimi i tij u shkaktua autogol nga mbrojtja e Udinezes.
Fantazisti u transferua nga Empoli në janar, ku nuk po gjente hapësira në formacion, dhe klubi i Sasuolos do të paguajë gjashtë milionë euro në arkat e toskanëve. 23- vjeçari ka luajtur këtë sezon 21 ndeshje, por minutazhi ka qenë i ulët.
Ai e ka nisur 8 herë si titullar dhe është zëvendësuar në shumicën e ndeshjeve dhe në 13 takime të tjera është future në lojë në pjesën e dytë.
Gjatë 1035 minutave që ka luajtur, ka shënuar një gol dhe ka dhuruar dy asiste. Ndërkohë një situatë tjetër pritet të jetë te Sasuolo, ku mesfushori do të marrë minuta, duke nisur nga sot kundër Napolit.
Sa u përket shqiptarëve të Empolit, pas Kristjan Asllanit, Nedimi ishte shqiptari i radhës i larguar, teksa në ekipin e Empolit ka mbetur vetëm mbrojtësi Ardian Ismajli.