Tomas Myler ka hyrë në sezonin e fundit të kontratës dhe mbetet ende një dilemë nëse atij do t’i rezervohet rinovim 1-vjeçar apo do të “varë këpucët në gozhdë” me bavarezët.
Nga Gjermania para pak ditësh u tha se 34-vjeçarit po i përgatitej kontrata e re deri në vitin 2025, por raportimet e prestigjiozes “Bild” kanë trazuar “ujërat”.
Mediumi në fjalë pohon se Myleri në ndeshjet e fundit shoqërohej nga një grup xhirimi kamerash e ku shkohet më tej se ai po realizon dokumentar në lidhje me etapën përmbyllëse të karrierës si futbollist profesionist.
Madje “Euro 2024” do të jetë kompeticioni i fundit që lojtari me numër “25” në kontingjentin e Bajernit do të zbresë në fushën e blertë. Vetë protagonist apo klubi nuk kanë shprehur diçka të tillë në prononcime.
Tomas Myler vlerësohet nga tifozëria bavareze si personazhi më popullor dhe i pazëvendësueshëm, i cili e ka nisur rrugëtimin në Mynih prej vitit 2008.