Fitorja në derbi, për më shumë pa Dushan Vlahoviçin dhe Federiko Kiezën në dispozicion, ishte një provë force për Juventusin, një sukses 2-0, i cili mesa duket ka entuziazmuar shpirtrat bardhezi, në pritje të ndeshjes me kryesuesit e Milanit, menjëherë pas pauzës së kombëtareve.
Dhe një prej atyre më euforikëve duket se është pikërisht një prej mungesave të mëdha të derbi, i cili ka vendosur që të bëjë një lëvizje të madhe ditën e djeshme, duke konfirmuar lidhjen e fortë që ka me Juventusin. Të parën Dushan Vlahoviç e tregoi në verë, gjatë merkatos, ku nuk pranoi asnjë ofertë edhe pse shumë prej tyre ishin ekonomikisht më të rëndësishme dhe më të majme, sesa ajo që fiton si rrogë te Juvja dhe panorama europiane që i ofronin. Ndërsa dje, 23-vjeçari ka vendosur që të refuzojë ftesën e Kombëtares së Serbisë, për eliminatoret e “Euro 2024” (verën e ardhshme në Gjermani), vetëm e vetëm për të rikuperuar dhe për të qenë në formë për Juventusin.
Fundja, fakti që distanca nga kreu i Juves me Milanin është ngushtuar në 4 pikë dhe sigurisht që ndeshje e 22 tetorit në “San Siro” merr rëndësi të veçantë, shumë të madhe, pasi një sukses i bardhezinjve mund të ishte hapi i parë i djemve të Alegrit për të ndjerë realisht se mund të synojnë edhe ata titullin kampion këtë sezon. Fundja, një tjetër sukses me Milanin mund të shtonte së tepërmi dozën e vetëbesimin dhe Dushan Vlahoviç me gjestin për të refuzuar Serbinë për Juventusin, për të qenë në dispozicion për Milanin, është një sinjal se në Torino besojnë dhe duan të besojnë në vazhdim se realisht mund të rikthejnë titullin kampion në Torino.