“Bruno Fernandesh t’i hiqet shiriti i kapitenit”, legjenda Kin nuk kursehet: Ten Hag nuk ia ka idenë se…

Mançester Junajtid pësoi një humbje të hidhur në derbi përballë Sitit në “Old Trafford” me rezultatin 0-3. Kjo gjë nuk është përtypur mirë nga legjenda e “Djajve të Kuq”, Roj Kin, i cili ka shpërthyer në kritika ndaj ekipit.

I pari që është sulmuar ka qenë portugezi Bruno Fernandesh, që sipas irlandezit duhet t’i hiqet menjëherë shiriti i kapitenit.

“Gjëja e parë që do të bëja është që t’i hiqja shiritin e kapitenit atij. E di që është një vendim i madh, por Fernandesh nuk e ka mentalitetin që duhet të ketë një kapiten. Është një lojtar i talentuar, por ajo që pash te ai në këtë ndeshje ishte se përtonte dhe vetëm ngrinte duart lart. Kjo gjë është e papranueshme. Fernandesh është lojtar fantastik, por është e kundërta e kapitenit”, u shpreh si fillim Kin.

Më pas ai kritikoi mënyrën e lojës së Ten Hag, duke thënë se holandezi ende nuk ka një 11-she fikse.

“Ai (Ten Hag) akoma nuk ia ka idenë se cili është ekipi më i mirë startues për të. Koka e tij është e mbushur me problemet që ka te Mançester Junajtid. Ku fillon dhe ku mbaron? Siti nuk ishte as në formën më të mirë dhe sërish luajti me Junajtid. Janë nivele të ndryshme”, përfundoi Kin.