Xhuzepe Marota është vendosur jo pak herë në qendër të akuzave të tifozëve të tij për menaxhimin e çështjes “Shkriniar” dhe largimin e sllovakut me parametër zero. Administratori i deleguar i Interit është ndalur dje para mikrofonave dhe pa dashur të përmendë emra i është referuar rolit të kapitenit.“Shiriti i kapitenit mban brenda vlera, të cilat duhet t’i ketë çdo lojtar që e mban në krah. Kush nuk është në gjendje të tregojë dhe të ndiejë përkushtim dhe dashuri ndaj ngjyrave që mban veshur dhe ndaj klubit në të cilin luan, nuk mund të synojë të jetë kandidat për kapiten”, ka qenë mesazhi i drejtuesit, që më pas ka folur edhe për rinovimet.
“Unë optimist për rinovimet? Gjithmonë”, ka dribluar duke qeshur Marota pyetjet, me Bastonin e Çalhanoglunë që janë të radhës për zgjatjen e kontratës në klubin zikaltër.