Dinastia Zidan është e destinuar të vijojë gjatë tek Reali i Madridit. Së fundmi, Eljazi, djali më i vogël i legjendës franceze, Zinedin Zidan i është bashkuar ekipit të parë të Realit në seancën e djeshme stërvitore.Trajneri i “Los Blancos”, Karlo Ançeloti ka vendosur që pas Botërorit të përziejë lojtarët tek Reali, duke fituar dhe elementë nga akademia. Së fundmi radha i ka ardhur dhe Eljazit, i cili ka vijuar në rrugën e tri vëllezërve të tij dhe të babait të tij në radhët e gjigantëve të Europës. Djali më i madh, Enco iu bashkua për herë të parë skuadrës A në vitin 2011 kur asokohe Reali drejtohej nga Zhoze Murinjo. Ai debutoi me Realin në vitin 2016 dhe ishte pjesë e grupit fitues në Ligën e Kampioneve në Kardif.
Djali i dytë, Luka, tashmë pjesë e Eibarit u rrit dhe ai në akademinë e Madridit, ndryshe “La Fabrica”. Ndër katër vëllezërit ai qëndroi më gjatë në klub. Ishte dhe portieri i tretë i Realit në suksesin në finalen e Kievit në Ligën e Kampioneve. Teo Zidan dhe Eljaz Zidan janë të fundmit nga dinastia Zidan që vijojnë në Valdebebas. Teo është stërvitur për herë të parë me Realin në vitin 2019 dhe luan aktualisht për Real B të drejtuar nga Raul. Tani radha i ka ardhur dhe 17-vjeçarit Eljaz.