Mançester Siti bëri vetëm 4 goditje ndaj Arsenalit, numri më i ulët i një skuadre të Pep Guardiolës në kampionat që prej prillit 2010: Barcelona në derbin kundër Espanjolit bëri po katër. Pasi uroi Arsenalin, trajneri i Sitit tha se skuadra e tij do të rikthehet pas këtyre dy humbjeve radhazi në kampionat.
“Një devijim bëri diferencën. Ne kishim 10-15 momente shumë të mira në pjesën e parë. Ata e nisën mirë pjesën e dytë. Ishte një lojë e ngushtë. Jo shumë shanse, një devijim. Ata fituan dhe urime Arsenalit. Ne u mbrojtëm shumë mirë, lojtarët dhanë gjithçka. Është futboll, ne e humbëm ndeshjen dhe do të kthehemi më të fortë”, tha katalanasi, i cili pranon se mungesa e Rodrit ka nxitur këtë situatë.
“Rodri është një lojtar i rëndësishëm, por ai nuk është aty për arsyen që të gjithë e dinë dhe ne duhet të ecim përpara. Çdo ndeshje është krejtësisht e ndryshme. Unë i njoh këta lojtarë për shumë vite dhe atë që kemi bërë së bashku. Është nder dhe privilegj t’i shoh ata të vrapojnë dhe luftojnë. Sigurisht që kemi humbur edhe ndaj Uolvesit. Tani kemi dy humbje radhazi dhe pushimin e kombëtareve. Shpresoj që lojtarët të rikthehen shëndosh e mirë dhe rinisim sërish”.