Gaza do të kthehet në një ‘qytet tendash’, është zotuar ministri izraelit i Mbrojtjes.
Gaza do të kthehet në një ‘qytet tendash’, është zotuar ministri izraelit i Mbrojtjes, duke premtuar se do të rrafshojë me tokë çdo ndërtesë në shenjë hakmarrjeje për sulmet terroriste të Hamasit në fundjavë.
Në orët e para të së mërkurës, forcat izraelite kryen 250 sulme ajrore në vetëm një orë, tha Trey Yingst i Fox News.
Ai tha se sulmet ishin në pjesët veriore dhe lindore të Rripit të Gazës, për të hapur rrugën për një pushtim tokësor. Mijëra trupa tokësore janë pozicionuar në kufirin me Gazën, tha Yingst.
Tre terroristë të Hamasit u qëlluan të martën nga forcat izraelite, ndërsa përpiqeshin të depërtonin në Izrael, shtoi ai.
Ushtria izraelite tha se forcat e saj, të mbështetura nga një helikopter dhe dron, u përleshën me militantët brenda territorit izraelit të martën në mbrëmje.
IDF thotë se lagjia e goditur nga sulmet ajrore, e quajtur nga ushtria al-Furqan sipas një xhamie në zonë, është një ‘fole terrori’ e përdorur nga Hamasi për të nisur sulmet kundër Izraelit.
Yoav Gallant, ministri izraelit i mbrojtjes, tha se ai ka ‘liruar të gjitha kufizimet’ ndaj trupave në luftën e tyre kundër Hamasit.
“Hamasi donte një ndryshim dhe do ta ketë. Ajo që ndodhet në Gaza nuk do të jetë më”, tha ai, duke folur me ushtarët pranë gardhit të Gazës.
“Ofensivën e filluam nga ajri, më vonë do të vijmë edhe nga toka. Ne kemi kontrolluar zonën që nga dita e dytë dhe jemi në ofensivë. Ajo vetëm do të intensifikohet.’