Milani ka lënë pas krizën duke sig uruar fitoren e dytë radhazi në kampionat (e treta së bashku me Champions-in), që e ndihmon të kapë vendin e tretë në Serinë A. Kuqezinjtë kanë fituar në fushën e Monzës, duke siguruar tri pikë të rëndësishme përballë skuadrës në pronësi të ish-presidentit Silvio Berluskoni.Gjithçka u vendos nga goli i Mesiasit në pjesën e parë të takimit, kur me një gjuajtje të fortë mposhti Di Gregorion. Më pas Milani ishte më i qetë në administrimin e manovrës dhe u mundua që të mbyllte ndeshjen, ndonëse edhe rrezikoi në disa raste të pësonte dhe vetëm shtylla dhe shumë fat e shpëtuan nga gjuajtja e Çurrias.
Falë këtij suksesi kuqezinjtë shkojnë drejt fundjavës për të sfiduar Atalantën meqë lufta për titull është kthyer në formalitet nga Napoli.
FJALA E PIOLIT – Dy suksese radhazi në këtë 2023, Stefano Pioli nuk i kishte rreshtuar kurrë, por analiza e tij e ndeshjes me Monzën shkon përtej statistikave. Të paktën kështu duket nga konferenca për shtyp e dhënë nga trajneri i “Djallit” pas suksesit më të fundit sezonal.
A është shëruar Milani?
Me dy fitoret e kampionatit dhe atë të Championsit, mendoj se jemi shëruar. Ka qenë një javë e përsosur dhe duke mos pësuar gol mund të them se jemi në rrugën e duhur. Kur të kemi karakteristikat e nevojshme, do të rikthehemi të luajmë me katër mbrojtës, pasi për momentin 3-4-1-2 është skema e duhur.
Përse kaq shumë vështirësi për De Ketelaren?
Duhet të vazhdojë të besojë te vetja dhe te rastet që krijohen. Shumë shpejt do ta gjejë golin, ndaj e këshilloj vetëm të punojë. Do të veçoja edhe debutimin sezonal të Bakajokos, i cili mund të na ndihmojë shumë gjatë sezonit.
Si e gjykoni sfidën e ekipit tuaj të ndare në dy pjesë?
Nuk luajtëm keq në pjesën e parë, ndërsa në të dytën e pësuam shumë presionin e rivalit. Në 20 minutat e fundit ramë disi në aspektin energjik, por jo në dëshirën për të marrë fitoren ndaj asaj që për momentin ishte skuadra me ecurinë më të mirë të kampionatit, duke përjashtuar Napolin. Pengu më i madh është që nuk shënuam për të mbyllur më herët ndeshjen.
Mendoni se keni mbrojtësit e duhur për të luajtur gjithmonë me tre në prapavijë?
Çau na jep fizicitet dhe mundësinë për të përballuar sulmuesit me peshë të rivalëve. Të tjerat kanë cilësi që ndihmojnë për të shoqëruar fazën ofensive. Mendoj se kam të duhurit.
Po sulmuesit si e kanë përjetuar ndryshimin e skemës?
Interpretimi është i duhuri. Për Monzën zgjodha Origin me Leaon për të tentuar të kapnim rivalët pas shpine. Nuk ia dolëm mbanë sa e kishim planifikuar, por përmirësimi nuk ka fund. Fakti që gjetëm rrugën e golit dhe fitoren është diçka e mirë, por mund të bëjmë më shumë. Ndaj Atalantës na pret një tjetër provë zjarri.
Kur mendoni se Menja dhe Benaser do të jenë gati?
Menja po vijon procesin e shërimit dhe shpresoj që të bëjë diçka me skuadrën që këtë javë ashtu si edhe Benaseri.