Golin e fundit për Milanin e kishte shënuar në tetor të 2021-shit, ndaj rrjeta ndaj Leçes e karikon më shumë Davide Kalabrian. Mbrojtësi kërkon trofeun e parë si kapiten (i vetmi që e ka fituar si lojtar) dhe këtë e ka konfirmuar në konferencë për shtyp.Keni folur me shokët e skuadrës pas ndeshjes së Leçes?
Ne folëm, por mbetemi po aq pozitivë si më parë. Nuk i kam parë as të dëshpëruar, as të trishtuar, na kanë munguar rezultatet në ndeshjet e fundit, por kjo nuk do të thotë se kemi mendime negative. Duhet të vazhdojmë të luajmë siç po bëjmë dhe rezultatet do të vijnë vetë.
Në një situatë si kjo, kush janë shokët që flasin më shumë?
Ata me më shumë eksperiencë. Skuadra merr përgjegjësitë e saj nga lojtari i parë deri tek i fundit. Nëse duam të bëhemi një ekip i madh, të gjithë duhet të ndihen pjesë përbërëse e këtij projekti. Ajo që i thamë njëri-tjetrit është e drejtë që të mbetet në dhomat e zhveshjes. Na pret një finale dhe duhet të japim gjithçka për ta fituar.
Çfarë sfide do të jetë me Dimarkon?
Jemi rritur së bashku në kombëtare, njihemi prej kohësh. Jam i kënaqur që ai po bën mirë. Do të jetë një duel i madh. Kam një jetë te Milani dhe shpresoj të jem në gjendje ta përfundoj karrierën time këtu, por nuk po mendoj për këtë tani.
Si i shpjegoni gabimet e mbrojtjes?
Mendoj se është absurde të jesh i ngopur për një titull. Sado që mund të kemi luajtur mirë dhe kemi fituar me meritë, ne duam të fitojmë përsëri. Një ekip i madh duhet të jetë i uritur dhe i gatshëm për të punuar. Sezoni është i gjatë, dhe kjo rënie fizike është normale. Ne duam të fitojmë Superkupën. Fokusi ynë është ky. Kemi bërë gabime në lexime dhe janë gabime që paguhen shtrenjtë në këto nivele. Ne i kemi studiuar këto situata dhe nuk duhet të bëjmë më gabime në fushë.
Imagjinoni të ngrini një trofe si kapiten?
Mund ta imagjinoj, është qëllimi im ta ngre këtë kupë. Por së pari duhet të japim gjithçka që kemi në fushë. Ëndrra ime është të fitoj sa më shumë trofe të jetë e mundur.
A do të jetë një lojë e veçantë për ju?
Natyrisht që edhe kjo është pjesë e një udhëtimi me ulje-ngritje, të luash për një finale si kapiten është një gjë e mrekullueshme. Të luash është një gjë, të fitosh është tjetër. Ne bëmë një punë të shkëlqyer për të qenë këtu, duke fituar një Skudeto me meritë. Tani ka një kupë që do të ishte po aq e rëndësishme. Nuk më pëlqen të bëj krahasime me kapitenët e tjerë nga e kaluara, dua të shkruaj historinë time dhe kjo kupë do të ishte shumë e rëndësishme për të gjithë.