Në fund të sfidës me Veronën, nuk kishte sesi Masimiliano Alegri të ishte i lumtur për tri pikët, por për herë të parë që e mbylli edhe me 10 lojtarë një ndeshje.
“Pashë një Juve në rritje në leximin e lojës. Komplimenta skuadrës, pasi bëri ndeshjen që duhej. Tani kemi edhe një renditje shumë herë më të kënaqshme, ndonëse Napoli po bën gjëra të pabesueshme dhe për momentin është e pakapshme. Gjithsesi në duhet ta mbyllim me fitore përpara Botërorit dhe të presin se çfarë do të na sjellin festat. Duhet të jemi thjesht optimistë”. Lidhur me paraqitjen e bërë nga individët, Alegri mbron argjentinasit, që u panë disi të rezervuar pas zbritjes së tyre në fushë.
“Di Maria dhe Paredes nuk u tërhoqën mbrapa, ndonëse është normale që iniciativa e tyre të jetë disi më e vakët, duke qenë se Botërori është pas 10 ditësh. Kjo nuk po i ndodh vetëm atyre po të gjithë Serisë A. Gjithsesi, jam i lumtur nga çfarë bënë në fushë. Por më shumë se për këdo tjetër, jam i lumtur për Aleks Sandron. Kartoni i kuq i marrë prej tij vlejti sa një gol për ne, pasi evitoi barazimin e Veronës. Prandaj ndryshe nga sa ndodh, këtë herë Sandro meriton një shpërblim, jo një gjobë nga ana e klubit. Madje, ai korrigjoi gabimin e Paredesit, pasi ishte ai i pari që duhej të shkaktonte faull dhe nuk e bëri. Tani të vëmë edhe qershinë mbi tortë, të mendojmë, të punojmë dhe të fitojmë me Lacion, me shpresën se në janar do të kemi një Kieza në formë të shkëlqyer dhe një Pogba në rikuperim e sipër, për të vënë në skenë për herë të parë të gjithë potencialin tonë”, përfundoi trajneri i Juventusit.