Mikel Arteta ka re fuzuar të ngrejë flamurin e bardhë në garën për titullin e Premier Ligës me Mançester Sitin, ndërsa përpara derbit me Çelsin, tekniku i “topçinjve” premtoi se ata do të luftojnë deri në fund. Pasi kryesuan për 247 ditë këtë sezon, tashmë Arsenali renditet në vend të dytë për herë të parë që prej 17 shkurtit, pasi Siti mundi 2-1 Fulhamin të dielën dhe u ngjitur +1 nga londinezët, por kampionët kanë edhe një ndeshje më shumë në dispozicion. Arsenali mund të rimarrë kreun nëse fiton sot ndaj Çelsit, por Siti ka sërish shansin për të bërë rokadën nëse fiton ndaj Uest Hemit 24 orë më vonë.
“Tani nuk është në duart tona. Ajo që është në dorën tonë është të fitojmë ndeshjet. Këtë do të përpiqemi që të bëjmë dhe pjesa tjetër i takon Sitit. Unë e di se çfarë ne do të përpiqemi të bëjmë. Tani luajmë pjesën më të bukur të sezonit dhe janë edhe pesë ndeshjet e fundit. Nuk ka përfunduar. Unë do të paguaja shumë para për të qenë në këtë pozicion sezonin e ardhshëm, më besoni”, tha tekniku i Arsenalit në konferencën e djeshme. Që Arsenali të fitojë titullin e parë prej vitit 2003, ata duhet të fitojnë pesë javët e tyre të mbetura dhe shpresojnë që Siti të rrëshqasë dy herë.
“A do të lërë Siti pikë? Unë e di sesa e vështirë është të fitosh çdo ndeshje të Premier Ligës. Ndryshe ata do të kishin fituar çdo javë të kampionatit, por nuk e kanë bërë”. Pavarësisht humbjes 4-1 ndaj Sitit javën e shkuar, Arsenali sërish siguroi një biletë në Champions sezonin e ardhshëm, për herë të parë që prej vitit 2017. Por Arteta thotë se skuadrën e tij nuk e kënaq vetëm vendi i dytë këtë sezon:
“Pavarësisht se ne siguruam një nga katër vendet e para me 6 ndeshje deri në fund, që është diçka që nuk ka ndodhur prej më shumë se një dekade në këtë klub, ne nuk jemi ende të kënaqur. Jemi të mërzitur që humbëm kreun dhe duam më shumë. Ne duam të jemi klubi që duam të jemi, të jemi vazhdimisht mes më të mirëve”.
Arsenali ka fituar 5 nga 6 përballjet e fundit me Çelsin në të gjitha kompeticionet, me përjashtim të humbjes 2-0 në Premier Ligë në gusht 2021 në “Emirates”.