Goli “in extremis” i shqiptarit Bardhi në Shkup, në barazimin 1-1 mes Maqedonisë së Veriut dhe Italisë, ka bërë që renditja e kampionëve të Europës të nisë të qajë, duke qenë se pas 3 ndeshjesh numëron vetëm 4 pikë të grumbulluara. Për këtë arsye, eliminatorja e mbrëmjes së sotme në “San Siro”, kundër Ukrainës, është një sfidë në të cilën Luçiano Spaleti dhe të tijtë janë të detyruar që të fitojnë, përndryshe mund të humbin distancën edhe nga ai vend i dytë minimal që të dërgon në “Euro 2024”.
Por sikur të mos mjaftonin dëmtimet me breshëri dhe humbjet e rëndësishme të pësuara nga Italia në këto orë të fundit, ato që vështirojnë duelin me ukrainasit janë edhe çështjet e nxehta brenda skuadrës. E para akuzat për portierin Xhanluixhi Donaruma, i cili fajësohet për pësimin e golit në Shkup, por trajneri Spaleti beson dhe konfirmon “Xhixhon” mes shtyllave:
“Përpara se të nisni me pyetjet po ua them unë i pari se titullari ndaj Ukrainës do të jetë Donaruma. Portieri paguan gjithmonë më shtrenjtë se të tjerët gabimet, por Donarumës nuk i falet asgjë, sepse është një djalë i destinuar për të qenë një kampion absolut dhe ndër më të talentuarit në botë në rolin e tij. Prandaj, të kritikosh atë bën edhe më shumë zhurmë dhe bujë ai që ka guximin ta bëjë këtë. Nuk e di, por ka disa persona që mezi presin që të godasin të tjerët, edhe pse nuk e mendoj këtë mënyrë logjikimi, – bën hyrjen e tij Spaleti në konferencë, duke kaluar më pas edhe te dy tema të tjera.
Verrati nuk pranoi grumbullimin? Jo, unë kam folur me atë, madje edhe Bonuçi më kërkoi personalisht që nëse më duhej të bashkohej për të ndihmuar kombëtaren. Të gjithë e duan dhe janë gati që ti bashkohen kur nevojiten dhe kjo ka ndodhur edhe me Verratin e këdo tjetër që mund të mendoni ju. Fitorja detyrim me Ukrainën? Renditja flet qartë dhe natyrisht që juve mund t’iu absurde, por unë jam i lumtur që jemi në këtë situatë. Kjo, pasi për mua është më e lehtë që të menaxhoj grupin, i cili nuk ka nevojë që të shtyhet nga unë për t’u karikuar për ndeshjen me Ukrainën, pasi e kupton rëndësinë e kësaj sfide dhe tri pikët që na duhen.
Pas Maqedonisë kemi biseduar dhe kemi punuar mbi disa aspekte që duhet të korrigjojmë dhe jam i bindur që do të marr përgjigjet e duhura. Me Maqedoninë ishte një ndeshje e çuditshme, e kushtëzuar nga shumë aspekte të papranueshme në kohët që jetojmë. Dhe falënderoj Elmasin (lojtarin maqedonas që Spaleti kishte te Napoli) që kërkoi falje, pavarësisht se mori një pikë ndaj nesh, për kushtet e fushës në të cilën ne luajtëm. Gjithsesi, tani është e kohë që të mendojmë për të shkuarën, por të përqendrohemi te Ukraina dhe të fitojmë në ‘San Siro’”, tha Spaleti në konferencën e djeshme.