Rasmus Hojlund mund të krijojë një pjesë të historisë së Ligës së Kampioneve kur ishskuadra e tij, Kopenhageni, të vizitojë “Old Trafford” sonte. Ylli i Mançester Junajtidit mund të luajë kundër vëllezërve të tij binjakë Oskar dhe Emil, që do të ishte hera e parë që tre vëllezër do të luanin në të njëjtën ndeshje të Ligës së Kampioneve. Hojlund, 20 vjeç, është dy vjet më i madh se binjakët, të cilët janë të dy shumë të vlerësuar.
Megjithatë, ata ende nuk kanë arritur të gjejnë një vend titullari te Kopenhagen, megjithëse mesfushori Oskar ka bërë shtatë paraqitje këtë sezon, duke përfshirë një në Ligën e Kampionëve. Emil bëri debutimin e tij në Ligën e Konferencës vitin e kaluar, por ka bërë vetëm një paraqitje në ekipin e parë këtë sezon.
Megjithatë sulmuesi ka shkëlqyer për ekipin e të rinjve me gjashtë gola në gjashtë ndeshje. Hojlund gjithashtu kaloi nga akademia e Kopenhagenit dhe shënoi pesë gola në 32 ndeshje për gjigantët danezë përpara se të largohej në janar 2022.
Rritja e tij meteorike ka bërë që ylli danez t’i bashkohej “djajve” 18 muaj pasi u largua nga Kopenhageni dhe ai i ka dhuruar klubeve pothuajse 100 milionë paund nga tarifat e transferimit. Por ishdrejtori i tij sportiv në klubin lokal Horsholm Userod Idraetsklub (HUI), Kristian Muruaks, beson se vëllezërit Hojlund janë edhe më të mirë se ylli i “djajve të kuq”.
KONFIRMIMI – Ai tha për “Manchester Evening News”: “Shumë njerëz që i kanë takuar të tre mendojnë se dy vëllezërit më të vegjël janë të paktën po aq të talentuar sa Rasmus. Të gjithë kanë qenë shumë më të avancuar në krahasim me mesataren, por dy vëllezërit më të vegjël, krahasuar me Rasmusin në të njëjtën moshë, kanë qenë përpara tij.
Për mendimin tim, nëse po flisni për talentin e pastër, do të shkoja deri atje sa të thosha se dy vëllezërit e vegjël kanë një avantazh të lehtë konkurrues. I preferuari im është Oskar. Emil është lojtari më elegant, ai është elegant kur driblon dhe ka pasime të bukura, ndërsa Oskar është më shumë një bulldog, ai është një luftëtar, një fitues, duke u futur në dyluftim, duke pasur guxim.
Unë mendoj se ai e ka këtë, sepse ai ishte më i vogël se të dy vëllezërit e tij, por edhe nga të gjithë të tjerët kundër të cilëve luante. Ai duhej të kompensonte, kështu që ai është i patrembur, por edhe shumë i mirë me top dhe ai ka atë lloj mentaliteti fitues. Mund ta shihni se ai dëshiron të fitojë në çdo situatë të lojës”.
Të tre vëllezërit kanë për të falënderuar babanë për zhvillimin e tyre të jashtëzakonshëm. Anders Hojlund ishte trajner te HUI dhe kalonte orë të tëra duke stërvitur secilin nga djemtë e tij individualisht kur nervat vlonin në seancat në grup.
Ai madje e shndërroi bodrumin e shtëpisë së tij në një fushë futbolli të brendshme, prej druri, duke i lejuar vëllezërit të vazhdonin të luanin futboll kur kushtet e pafavorshme të motit ndalonin lojën në natyrë.
Të tre u rritën duke luajtur me njëri-tjetrin, por dëshira e tyre për të përmirësuar njëri-tjetrin detyronte babanë e tyre ndonjëherë të ndante stërvitjen.
Por kur Oskar dhe Emil nënshkruan kontratat e tyre të para te Kopenhageni së bashku në fund të vitit 2021, ky i fundit shprehu krenarinë e tij që ishte në gjendje të vazhdonte rrugëtimin e tij të futbollit përkrah binjakut të tij.
Treshja mbetet e afërt me vëllanë e madh, i cili zbuloi se i telefonoi Oskarit dhe Emilit menjëherë pas shortit të Ligës së Kampionëve.
EMOCIONET – Sulmuesi është i emocionuar që do të përballet me ish-klubin e tij dhe mendon se do të ishte fantastike të luante kundër njërit ose të dy vëllezërve të tij.
Hojlund gjithashtu do të dëshirojë të provojë se është më i mirë se vëllezërit e tij më të vegjël: Emil pretendohet të jetë talenti më i mirë për që ka luajtur për HUI, jo Rasmus. Por Hojlund ka arritur majat falë etikës së tij të mahnitshme të punës dhe dëshirës së tij për të vazhduar të përmirësohet.
Ndërsa priste transferimin e tij tek Junajtidi në verë, sulmuesi u kthye në shtëpinë e tij në Danimarkë, Horsholm, dhe përdori facilitetet e HUI-t për të ruajtur gjendjen e tij fizike. Hojlund mbërriti në Mançester me një dëmtim, por ai tashmë është rikthyer në 100%.
Ai ende nuk ka shënuar në Premier Ligë, por ka rezultuar vdekjeprurës në Champions, kështu që mund të luajë një rol kyç kundër Kopenhagenit sot.
Skuadra e Erik ten Hagut ka shumë nevojë për një fitore pasi ka humbur ndaj Bajernit të Mynihut dhe Gallatasarajit në dy ndeshjet e para në grupe.
Hojlund ka shënuar tre gola në dy ndeshje të Ligës së Kampioneve, por ish-lojtari i Çelsit, Rud Gulit është i shqetësuar se bashkëlojtarët e tij janë shumë të pangopur për të nxjerrë më të mirën prej tij.
Kopenhageni gjithashtu humbi ndaj Bajernit, por barazoi me Gallatasarajin që do të thotë se ata janë një pikë përpara Junajtidit në vendin e fundit.
Hojlund u zëvendësua në fitoren 2-1 të së shtunës ndaj Shefilld Junajtidit pasi Ten Hagu deklaroi se dëshiron ta mbajë atë të freskët, me të riun që po tregon formën e tij më të mirë në Europë.