Liverpuli bën edhe blerjen e tretë në merkaton e kësaj vere dhe bëhet klubi i parë që mbyll merkaton 11 javë përpara rënies së gongut. Në “Anfield” mbërrin edhe Kalvin Ramsej, mbrojtësi i talentuar skocez, i cili bëhet transferimi i tretë dhe i fundit i “Reds”- ave këtë verë.
Liverpuli ka qenë në negociata me Aberdinin për 18-vjeçarin prej disa javësh dhe arriti më në fund marrëveshjen për transferimin e tij për 4 milionë paund plus 2.5 milionë bonuset.
Mbrojtësi i djathtë i cili muajin e shkuar u shpall edhe lojtari më i mirë i ri në Skoci, pritet të marrë vetëm lejen për të udhëtuar drejt Mersejsajdit këto 24 orë dhe kaluar vizitat mjekësore.
Ramsej i cili regjistroi 33 ndeshje me Aberdinin sezonin e shkuar, vjen si përforcim për korsinë e djathtë të mbrojtje, ku operon Trent Aleksander-Arnold.
Sipas “Daily Mail”, Liverpuli e mbylli në kohë rekord merkaton ndërsa më parë kishte transferuar edhe mesfushorin ofensiv, Fabio Karvajon, nga Fulhami (5 milionë paund, plus bonuset), ndërsa bleu edhe sulmuesin Darvin Nunjez nga Benfika për shifrën rekord të 85 milionë paundëve bashkë me bonuset (100 milionë euro).