Kryeministrja britanike Liz Truss ka kërkuar falje për gabimet që ka bërë në javët e para në detyrë, por këmbënguli se ajo do të udhëheqë partinë e saj në zgjedhjet e ardhshme të përgjithshme.
Duke u ndalur te shkurtimi i taksave të shpallura në buxhetin e muajit të kaluar të cilat më pas u anuluan, Truss tha. “Unë e kuptoj që kemi bërë gabime. Më vjen keq për ato gabime por unë i rregullova. Emërova një kancelar të ri. Tashmë ne kemi rikthyer stabilitetin ekonomik dhe disiplinën fiskale”, u shpreh ajo.
Kryeministrja theksoi se kanë bërë shumë hapa të shpejtë në një kohë të shkurtër duke pranuar se kjo nuk ishte gjëja e duhur.
“Unë doja të veproja për të ndihmuar njerëzit me faturat e tyre të energjisë duke nisur nga taksat e larta, por ne shkuam shumë larg dhe shumë shpejt. Unë e kam pranuar këtë. Shenja e një politikani të ndershëm është kur ata pranojnë gabimet e tyre”, tha Truss.