Davide Fratesi është për momentin mesfushori më i kërkuar në Itali. Futbollisti i Sasuolos ka spikatur këtë sezon jo pak teksa Interi dhe Milani janë vënë seriozisht pas tij. Megjithatë, mesfushori duket se e ka bërë zgjedhjen megjithëse pranon se gjithçka mund të ndryshojë në merkato.
Në një intervistë të dhënë për “La Gazzetta dello Sport”, Fratesi shprehet se nuk lexon shumë për merkaton pasi ka avokatin e tij që merret me këtë çështje. Ai shton se gjyshja i jep lajmet ditore ndërkohë që pranon se e ka zgjedhur edhe skuadrën por pa bërë të ditur emrin.
“Nuk e shoh shpesh telefonin pasi i kam thënë avokatit tim Riso që të mbyllë gjithçka dhe të më njoftojë kur të ketë përfunduar. Është shumë strikt dhe punon shumë në fshehtësi. Gjithsesi e kam edhe gjyshen, Stefania e cila çdo ditë më përpilon një listë me lajmet ditore dhe mi çon. Fantastike!
E kam zgjedhur skuadrën ku dua të luaj por jemi në merkato dhe gjithçka mund të ndryshojë. Nuk dua të publikoj emrin pasi i kam thënë menaxherit të punojë. Do të më pëlqente të luaja me Barelën, sepse mund të rri edhe në të majtë dhe të godas me këmbën e preferuar. Ndonjëherë bëj dëm edhe me tjetrën”, u shpreh Fratesi.