Liverpuli provon që të riniset. Një dopietë e Salahut vendos fitoren 2-1 në shtëpinë e Totenhemit. Klopit i duhej një konfirmim pas fitores fantastike ndaj Napolit në Champions.
Skuadra e tij vinte pas dy humbjeve radhazi në kampionat dhe ajo u përgjigj. Salah, pas vështirësive të fillimsezonit, ka rigjetur ritmin e tij të golave dhe dje festoi dopietën e parë në kampionat. Nunjez po përmirësohet, ndërsa dëmtimet që nisën prej fillimit këtë vit, herët a vonë do të përfundojnë. Është kjo që uron edhe Konte, i cili me këtë humbje ia dorëzon vendin e tretë Njukasëllit të pandalshëm. “Reds”-at e nisin fort në Londër dhe zhbllokohen pas 11 minutash me rastin e tretë: pas dy tentativave personale, Nunjez shërben Salahun, i cili në qendër të zonës reagon aq shpejt sa lë të palëvizur Lorisin.
Reagimi i parë i Totenhemit, në 15’, përplaset në shtyllën që Perisiç godet me kokë pas asistit të bukur të Kejnit. I dyti vjen kundër arbitrit, që lejon lojën pas një kontakti të dyshimtë në zonë mes Sesenjonit dhe Arnoldit. Por në pushim vendësit do të shkojnë edhe me një tjetër gol të pësuar: nga rivënia e Alisonit në 40’, Daier kërkon të kthejë topin pas me kokë, por jep një asist për Salahun, i cili niset drejt porte dhe djeg Lorisin me një parabol të ëmbël. Totenhemi rinis me një tjetër shtyllë të Perisiçit, këtë herë gjen traversën. Në 70’ Kulusevski gjen Kejnin në zonë, i cili hap ndeshjen me një diagonale perfekte. “Spërsat” provojnë të shtojnë presionin në fund, por është Liverpuli që i shkon më pranë golit (Në 82’, Nunjezin e ndal vetëm traversa).
KLOP – “Fituam një ndeshje të madhe. Kishte kaluar kohë nga suksesi ynë i fundit në transfertë dhe jam i gëzuar për këtë. E dimë që duhet të luftojmë. Kemi mundur dy rivalë të mëdhenj, por në kompeticione të ndryshme”, tha trajneri i Liverpulit, i cili uroi edhe Salahun, pasi tani është vetëm 3 gola larg Dalglishit në listën e shënuesve më të mirë të klubit: “Dalglish dhe Fauler ndoshta kishin momente kur nuk shënonin. Mo është i pandalshëm. Ai është në 8 shënuesit më të mirë të Liverpulit dhe nuk do të ndalet. Statistikat e tij janë një çmenduri”.