Julian Nagelsman nga “dështak” i bordit të Bajernit ka marrë profilin e një “profeti” në Gjermani, e ku tifozët e “pancerave” e shikojnë si personazhin e duhur që mund t’u rikthejë buzëqeshjen, pas dështimeve të njëpasnjëshme në turnetë madhorë. Fundi i muajit mars preku fundin e prestigjit të karrierës aktuale prej Nagelsmanit, shkarkimi i beftë në pozitën e trajnerit te Bajern Mynihu.
Bavarezët ishin aktivë në të tria frontet, konkretisht Kupë, Champions dhe Bundesligë, por që bordi i asaj periudhe me Kahn dhe Salihamixhiçin në krye vendosën që 36-vjeçari të shkarkohej.
Në këtë panoramë është ndalur edhe Julian Nagelsman, i cili në konferencën e djeshme për shtyp ka zbuluar detaje të një përjetimi të vështirë emocional.
NAGELSMAN- “Prej moshës 14-vjeçare nuk i jam ndarë futbollit në role të ndryshme. Por pas largimit nga Mynihu nuk ishte e lehtë. Edhe pse në thelb pushimet karakterizojnë periudhën e relaksimit dhe prezencën pranë personave që do, por rezultoi e kundërta. Shpeshherë mendoja thellë tërheqjen përfundimtare nga futbolli, pavarësisht rolit.
Ndihesh i përhumbur. Kurrë deri në këtë moshë nuk e kisha ndierë veten kaq keq. Ama pasioni në lidhje me futbollin mbeti dhe ja ku jemi. Stoli i kombëtares në një moment të tillë nuk është i lehtë, ndonëse jam i përgjegjshëm për sfidat.
Mezi po pres të debutoj në pankinën e Gjermanisë. Do të jetë tejet emocionuese që të jem timonier i përfaqësueses në kampionatin europian, i cili do të zhvillohet në shtëpinë tonë. Jemi ambiciozë dhe me objektiva madhore, koha e duhur për t’i përveshur mëngët”, përfundoi me nota të larta entuziaste Julian Nagelsmani.
Ish-trajneri i Bajernit në periudhën qershor 2021-mars 2023 ka firmosur kontratë me “pancerat” deri në përfundimin e “Euro 2024”.
Kampionët e 4-fishtë në rangun e Botërorëve u gjendën në një pozitë aspak të favorshme në urdhrat e Hans Flik, e ku shkarkimi i tij mbeti e vetmja zgjedhje sipas përfaqësuesve të federatës.
Nuk dihet nëse Nagelsmanit do t’i serviret një opsion i zgjatjes së bashkëpunimit në këtë detyrë, nëse organizatorët do të bindin me lojë e rezultate.