Dëmtohet Endri Çekiçi. Mesfushori i Kombëtares do të mungojë për të paktën 15 ditë.
Lajmin e ka bërë të ditur trajneri i Koniasporit, Ilhan Palut, i cili do të vuajë mungesën e 25-vjeçarit për takimin ndaj Kaiserisporit.
Lojtari kuqezi pësoi një dëmtim në ndeshjen me Kasimpashën, që mund të rrezikojë edhe grumbullimin për miqësoret me Italinë dhe Armeninë, që Shqipëria ka në program për të luajtur.
Pogradecari ka luajtur deri tani në nëntë ndeshje gjithsej dhe ka shënuar dy supergola, një ndaj Gallatasarajit që do të mbahet mend për shumë kohë, edhe për trajektoren që mori goditja e tij.
LËNDIMET – Në dyshim është prezenca e Endri Çekiçit në ekipin kombëtar për miqësoret e javës tjetër, por jo vetëm mesfushori, pasi Edi Reja duhet të përballojë “Axurrët” pa disa lojtarë kuqezi, të cilët vuajnë dëmtimet së fundmi.
Në portë nuk llogaritet Tomas Strakosha, i cili mund të kthehet në muajin janar, ndërkohë Etrit Berisha duket sikur i ka lënë problemet në bërryl dhe u grumbullua nga Torino në ndeshjen e fundit me Bolonjën.
Po ashtu Frederik Veseli ka mbyllur vitin dhe pritet të kthehet në janar, ndërkohë dëmtim po vuan edhe Klaus Gjasula me Darmshtadin kur mungon prej disa ndeshjesh.
Gjithashtu edhe Amir Abrashi ka munguar për shkak dëmtimi në Zvicër dhe është drejt rikuperimit dhe e njëjta situatë është edhe për Qazim Laçin në Francë, që po punon për të kapur formën maksimale.
Ndërkohë që një lajm i mirë vjen për Rei Manajn, i cili është kthyer në stërvitje me Uotfordin, ku mungon prej muajit gusht, ku më pas kaloi edhe një operacion, por dje ka postuar nga stërvitja me klubin anglez.