Momenti/ Tramvaji me autobusin përplasen në Stamboll, të paktën 19 të plagosur

Një aksident i rëndë ka ndodhur mëngjesin e sotëm në Stamboll.

Mediat turke raportojnë se një tramvaj dhe një autobus janë përplasur në Alibeyköy. Nga përplasja 19 persona kanë mbetur të plagosur, 4 prej tyre në gjendje të rëndë. Pasagjerët e bllokuar në autobus u shpëtuan nga zjarrfikësit ndërsa të plagosurit u transportuan në spital.

Në lagjen Alibeyköy, tramvaji u përplas me autobusin IETT me targa 34 TP 7116 me pasagjerë në të. Në pamjet e mëposhtme të marra nga kamerat e sigurisë, mund të shihet momenti kur tramvaji përplaset me autobusin dhe e ndan në dy pjesë. Ende nuk dihet se çfarë e ka shkaktuar një përplasje të tillë kaq të rëndë.