Mauricio Poçetino këmbëngul se fitimi i Kupës Karabao është një prioritet për Çelsin këtë sezon, ndërsa ai do të përpiqet të sigurojë trofeun e tij të parë në Angli. Skuadra e Armando Brojës, i cili mund të jetë edhe titullar sot në “Stamford Bridge” pret nënkampionët e sezonit të kaluar, Njukasëllin në çerekfinale, dhe do të përpiqet të presë biletën në katër skuadrat më të mira të kompeticionit vendës, për herë të parë që nga sezoni 2021-22.
“Sigurisht, unë dua të fitoj një trofe këtu në Angli. Unë dua të ngre një trofe tani në këtë kompeticion, sepse është e rëndësishme”, tha trajneri argjentinas në konferencë.
“Kjo do të thotë shumë sepse ne duam të jemi të suksesshëm për klubin tonë. Gjëja më e rëndësishme është të fitosh një trofe. Ky është një prioritet. Është në mendjen tonë, objektivi ynë dhe ne duhet të jemi gati nesër (sot), për të qenë më pranë fitimit të një trofeu. Për Njukasëllin është gjithashtu një kompeticion i rëndësishëm. Për ne ishte që në fillim të sezonit, një nga objektivat tanë dhe është ende një nga objektivat tanë. E dimë se do të përballemi me një ekip shumë të mirë, një ekip të Ligës së Kampioneve dhe do të jetë e vështirë”, shtoi Poçetino.
DEBUTON NKUNKU – Ai konfirmoi edhe se Kristofer Nkunku do të debutojë sot pas rikthimit nga dëmtimi në gju. Por me shumë mundësi sulmuesi francez do ta nisë nga stoli, duke mos qenë ende 100% për t’ia lënë vendin e titullarit njërit mes Armando Brojës apo Nikolas Xheksonit:
“Tani ka të bëjë me ndihmën që ne duhet t’i japim atij që ai të ndihet 100%, dhe më pas të shohim sesi mund ta ndihmojë ekipin dhe të shohim se në cilin pozicion, në cilat dinamika të ndryshme ai përshtatet dhe është vendimtar. Kjo është ajo që të gjithë presin. Tani ne kemi Xheksonin dhe Broja është plotësisht i rikuperuar.
Mendoj se Nkunku mund të luajë si numër 9, por ai mund të luajë edhe si numër 10, 7 apo 11, në pozicione të ndryshme. Në fazën përgatitore ne e aktivizuam atë në pozicione të ndryshme dhe ai ishte momenti kur ne, mund të bënim vlerësime dhe analizonim. Por pas 4-5 muajsh jashtë, kombinimet janë plotësisht të ndryshime ndaj fazës përgatitore, sepse skuadra ka evoluar dhe situata ka ndryshuar”, tha Poçetino.