Teksa në gjykatën e Posaçme SPAK është shënuar seanca 15-të ndaj të pandehurve, Etien Cani, Ervis Bardhi, Klajdi Dokoli dhe Ardjan Çapja, avokatët mbrojtës të pandehurve, kanë vendosur ta shtyjnë për të dytën rradhazi procesin gjyqësor.
Të katër të pandehurit së bashku me Florenc Çapjan dhe Olsi Lekun, që janë ndaluar në Dubai dhe Athinë, akuzohen për vrasjen e Gentian dhe Nezir Beqirit, në 15 Gusht 2012 në Elbasan.
Në seancën e djeshme, kur ishin planifikuar të pyeteshin disa dëshmitarë të organit të akuzës, trupi gjykues është njohur me mungesën në bllok, të 4 avokatëve që mbrojnë interesat ligjorë të pandehurve.
Avokatët e Ardjan Çapjas, Aldo Shkëmbi dhe Neshat Fana, mësohet se nuk janë paraqitur në këtë seancë gjyqësore, duke paraqitur para gjykatës dhe arsyet ligjore të mungesës së tyre në seanca.
Të njëjtën strategji kanë ndjekur dhe dy avokatët e tjerë, Pranvera Doci dhe Skerdilajd Dalipi, të cilët nuk janë paraqitur në seancën gjyqësore.
Këta dy avokatë rezultuan se kishin munguar edhe në seancën e 9 Marsit 2022, duke sjellë dështimin e seancës dhe stopimin e këtij procesi gjyqësor.
Procesi gjyqësor është në fazën përfundimtare, pasi nga lista e prokurorisë së posaçme SPAK, mësohet se kanë mbetur për tu pyetur dhe tre dëshmitarë.
Ndërkohë ende në këtë proces gjyqësor, nuk është marrë dëshmia e bashkëpunëtorit të prokurorisë, Ervis Bardhi, i cili ka treguar me detaje të gjithë dinamikën dhe pazaret, që kanë kryer me Ardian dhe Florenc Çapjan, për vrasjen e Gentian Beqirit.