Ndryshimet në kodin rrugor të cilat hyjnë në fuqi pas botimit në fletoren zyrtare parashikojnë testimin e drejtuesve të mjeteve për lëndë narkotike dhe heqjen e patentës përsa kohë qytetari është nën varësinë e drogës. nenet e reja parashikojnë edhe ritestim nga e para në teori dhe praktikë për ata qytetarë që humbasin patentën si pasojë e shkeljeve të shumta dhe heqja e pikëve.
Ndryshimet e fundit në Kodin Rrugor të cilat tashmë do të hyjnë në fuqi parashikojnë heqjen ose pezullimin e patentës për përdoruesit e drogës.
Në nenin 11 të ndryshimeve të reja, theksohet se pezullimi i lejes së drejtimit vijon për aq kohë sa, sipas vlerësimit mjekësor mbajtësi i saj vijon të ketë varësi ndaj substancave narkotike apo psikotrope.
Konkretisht, ndryshimet e bëra në nenin 346 të kodit rrugor, përcaktojnë mënyrën e kontrollit ndaj drejtuesve të mjetit për përdorimin e alkoolit, përmes frymënxjerrjes dhe gjakut. Ndërkohë për lëndët narkotike testimi kryhet nëpërmjet sekrecioneve të marra nga tampon drogë-testues i cili mat llojet e ndryshme të lëndëve narkotike.
Në kod theksohet se pajisja, përveç tregimit të rezultatit të matjes, duhet që, nëpërmjet një stampuesi të përshtatshëm, t’i japë këto prova të dokumentuara/printuara.
Pas kryerjes së testit nga institucionet shtetërore me iniciativën e policisë, kjo e fundit njofton drejtorinë e Shërbimit të Transportit Rrugor.
Ndryshimet në kod, parashikojnë edhe ritestim për ata qytetarë të cilëve u janë hequr pikët e patentës si pasojë e shkeljeve të përsëritura.
Konkretisht në nenet e ndryshuara thuhet se mbajtësi i lejes së drejtimit, që ka humbur totalin e pikëve, duhet të ndjekë një kurs pranë autoshkollave të licencuara.
Në përfundim të këtij kursi, drejtuesi i mjetit duhet t’i nënshtrohet provimit teorik dhe praktik për të rimarrë lejen e drejtimit.
Ndryshimet në kodin rrugor parashikojnë rregulla të reja edhe për mjetet me targa të huaja.
Kjo kategori lejohet të përdoret për qarkullim në territorin shqiptar vetëm nga pronari që ka vendbanimin ose vendqëndrimin jashtë territorit shqiptar ose personi që ka të drejtën e përdorimit të mjetit sipas një akti juridik të lëshuar nga pronari.
Një tjetër ndryshim lidhet me vendosjen në kod të rregullave të qarkullimit lidhur me drejtuesit e mjeteve me pedale dhe të patinave elektrike të cilat kanë gjetur përdorim të gjerë vitet e fundit. Këto mjete lejohet të përdoren sipas rregullave të qarkullimit por ndryshimet në kod parashikojnë përdorimin e kaskës mbrojtëse nga drejtuesi i tyre, dhe ndalimin e qarkullimit me këtë kategori mjetesh gjatë natës.