Zbardhet kërkesa e deputeteve të mazhorancës për ndëshkimin e Sali Berishës. Dy ditë më parë pati debate në Kuvend, pasi deputetja e Partisë Socialiste, Anila Denaj u shpreh se gjuha e ish-kryeministrit Sali Berisha se ministret bëjnë orgjira dhe se i ka video është e papranueshme. Për këtë arsye ajo kërkoi masa ndëshkimore. Ditën e djeshme një shkresë është firmosur nga 31 deputetë. Në shkresën e deputetëve thuhet se Berisha ka kohë që nuk reflekton asnjë integritet individual dhe institucional. “Në Kodin e Sjelljes së deputetit, ndër të tjera, thuhet se deputeti duhet të reflektojë integritet individual dhe institucional dhe të shmangë çdo diskriminim për shkak të gjinisë, bindjeve politike apo çdo natyre tjetër. Ndërkohë deputeti Sali Berisha ka kohë që jo vetëm nuk reflekton asnjë integritet individual dhe institucional apo që jo vetëm nuk shmang asnjë diskriminim për shkak të gjinisë e të bindjeve politike, por ka marrë me përdhunë statusin e dikujt që mund të nxjerrë nga goja çdo lloj ultësie gjuhësore pa u përballur me asnjë konseguencë të asnjë natyre. Kjo deklaratë bëhet referuar nenit 3 të Kodit të Sjelljes së Deputetit, i cili parashikon parimet e përgjithshme të sjelljes së deputetit gjatë ushtrimit të mandatit dhe aplikohet për çdo veprimtari të deputetit kudo në Kuvend e jashtë tij. Normalizimi i vulgaritetit të këtij “shejtan budallai” të pandëshkueshëm qoftë për krimet ulëritëse të së shkuarës dhe qoftë për ulërimat kriminale të së tashmes, nuk mund të pranohet më prej nesh si një privilegj i pakontestuar, të cilin deputeti Sali Berisha mund ta ushtrojë në praninë tonë në çdo seancë të Kuvendit të Shqipërisë”, thuhet në shkresë.
Akuza Berishës për shantazh
Ndërkohë, ndaj ish-kryeministrit Sali Berisha janë bërë akuza për shantazh. “Ai i ka lëshuar krejt frerët dhe ka bërë gjithçka të turpshme për një deputet të Kuvendit të Shqipërisë, duke shantazhuar pa dallim dhe në mënyrën më të padenjë zyrtare, deputete, ministre, ambasadore e mbi të gjitha vetë familjet tona, po ne besojmë se ky individ është kthyer në një ngacmues tejet problematik edhe për çdo familje normale shqiptare. Ne kemi bindjen se deputeti Sali Berisha nuk duhet lejuar të marrë pjesë në seancat e Kuvendit, nëse nuk bën njërën nga të dyja: Ose të nxjerrë provat që mbështesin shthurjen ekstreme të gjuhës së tij ditët e fundit ose t’u kërkojë falje publikisht subjekteve të dhunës së tij të shfrenuar verbale. Përsa më sipër, kërkojmë që organet kompetente të Kuvendit të fillojnë menjëherë procedurat për marrjen e masës disiplinore të përjashtimit të deputetit Sali Berisha nga seancat e Kuvendit të Shqipërisë, me afatin maksimal të lejuar nga rregullorja dhe njoftojmë Kuvendin dhe publikun e gjerë, se këtë kërkesë do ta përsërisim vijimësisht, deri kur ky shkelës recidiv i çdo norme të bashkëjetesës demokratike të ketë plotësuar njërën prej dy kërkesave të mësipërme, për t’u ulur në të njëjtën sallë kuvendore me të poshtëshënuarat”, thuhet në shkresë.
A do ta hedhin në gjyq Berishën deputetet e PS? Flet Felaj
Nga ana tjetër, deputetja e PS, Ermonela Felaj ka reaguar dje në lidhje me gjuhën e përdorur të Sali Berishës ndaj deputeteve socialiste. Teksa e ka konsideruar gjuhë seksiste, Felaj në një intervistë për mediat është shprehur se veprimet e kolegëve demokrat tregojnë prapambetje dhe sipas saj janë të patolerueshme. Këtë e tha kur u pyet nëse deputetet socialiste do e hedhin në gjyq Berishën. “E gjitha është një sajesë dhe është diçka totalisht e montuar dhe për interesa të një njeriu të vetëm që është Sali Berisha. Këto janë veprime të karakterit personal. Ajo që ne kërkuam ishte se Berisha të sanksionohet për një gjuhë të tillë, në rastin konkret një gjuhë seksiste ndaj të gjitha grave dhe vajzave në Kuvendin e Shqipërisë. Edhe sjellja e disa deputetëve të opozitës la shumë për të dëshiruar. Nuk pati respekt për fjalët e kolegëve, pati pasthirrma të ndryshme, disa e shoqëruan me një lloj ovacioni të egër në mbrojtje të Berishës, gjë e cila mua më tregon prapambetje. Sjellje të tilla janë të patolerueshme”, deklaroi Felaj.
Socialistët kërkesë për të përjashtuar Berishën dhe Flamur Nokën
Për të tretën herë në harkun kohor të dy muajve, shumica socialiste i drejtohet me një kërkesë Sekretariatit për Procedurat, Votimet dhe Etikën, për të ndëshkuar deputetët demokratë, me argumentin se bllokuan seancën plenare të së hënës. Shtatë ligjvënës socialist kanë hedhur firmat për ndëshkimin e Sali Berishës, Edi Palokës, Flamur Nokës dhe Belind Këlliçit. Në këtë kërkesë thuhet se Flamur Noka me veprimet e përsëritura pengoi zhvillimin normal të seancës. Ndërsa Sali Berisha përdori një gjuhë jo parlamentare. Kërkohet ndëshkimi Edi Palokës dhe Belind Këlliçit pasi në bashkëpunim me Berishën dhe Nokën morën pjesë në veprime bllokuese të foltores së parlamentit.