Stefano Pioli mund të qeshë, pasi e nisi me një 2-0 neto në Bolonja dhe pa shkëndijat e para të një armate të re që Milani ka bërë pjesë të vetën. Ndërkohë, mund të nisë të kërkojë edhe diçka më shumë nga dyshja Zhiru-Pulisiç, të cilët u panë në sintoni të plotë dhe zgjidhën ndeshjen e parë sezonale.
Pamë disa gjëra shumë të bukura”, ishte komenti i parë i trajnerit kuqezi, pasi sfidës në Bolonjë.
“Sigurisht që duhet të punojmë ende shumë, për të gjetur më tepër ekuilibër. Kjo dukej qartë dhe nuk është se kam pse ta fsheh, duke qenë se kur niseshim në kundërsulm bëmë gjëra të rëndësishme, por kjo nuk do të thotë se duhet të lëmë një hendek nga prapa, që kundërshtari t’i afrohet me lehtësi zonës sonë. Por ishte vetëm ndeshje e parë dhe e rëndësishme është që blerjet e reja kuptohet se po hyjnë në mekanizmat e lojës që unë dua që të shpreh në këtë sezon”.
Ndërkohë, për sa u përket individëve, ai gjithashtu se boshti i skuadrës tashmë ekziston dhe ai duhet vetëm të zhvillohet, por duke pritur edhe kapjen e formës së mirë edhe nga dy blerje të tjera, nga të cilat pritet shumë si Okafor dhe Çukvueze.
“Kjo fitore e parë u dedikohet drejtuesve të klubit, të cilëve i kisha kërkuar futbollistë me cilësi specifike, të fortë në duelet një kundër një, sidomos dhe ato më kanë sjellë ata që desha. Edhe Okafor dhe Çukvueze, që hynë më vonë, patën një impakt të mirë, por janë ende larg formës dhe vetëm mund të përmirësohemi. Besoj se po lind një grup i bukur dhe blerjet që kemi bërë do të na japin një ndihmë të madhe. Cili është boshti i Milanit? U pa qartë në fushë se kam në dorë edhe disa superheronj, i pari mbi të gjithë Leao. Ia them çdo ditë se ka fuqi të mbinatyrshme dhe ato duhet t’i vërë edhe në dispozicion të skuadrës, jo vetëm kur i kërkohet të shënojë vetë. Pastaj, Zhiru është një shembull për t’u marrë… Ndërsa Menja është lideri ynë, i vetmi tek i cili shoh cilësitë e Ibrës. Pastaj edhe Pulisiçin që e doja me çdo kusht nuk më zhgënjeu, përkundrazi, pasi ka cilësi që të bëjë disa role, por siç e patë di që të lëshojë edhe gola nga kudo. Ndaj, le të jetë ky një ogur i mirë për ne”, përfundoi Pioli.