Ndeshja mes Juventusit dhe Interit ka dhuruar një episod shumë të veçantë në minutën e 63-të të saj. Bardhezinjtë gjetën rrjetën me anë të Danilos, por pas 4 minutash vëzhgim me VAR, goli u anulua.
Danilo kishte gjuajtur topin me të majtën, por më pas një devijim e kishte shoqëruar atë drejt rrjetës. Devijimi ishte bërë në dorën e djathtë të lojtarit brazilian dhe sipas rregullores, VAR kishte të drejtë të ndërhynte për të sinjalizuar anulimin e këtij goli për këtë prekje me dorë të lojtarit që shënonte.
Por situata nuk është aq e thjeshtë, pasi në ato momente, Danilo nuk kishte “kontrollin” e dorës së tij dhe nuk mund të shmangte topin. Kjo, pasi shihet qartësisht që De Vraj kishte mbërthyer dorën e futbollistit të Juventusit në ato çaste duke e bllokuar në atë pozicion.Një rast më të vërtetë i çuditshëm, ku interpretimi i rregullores bëhet shumë kompleks dhe hap vend për diskutim.