Juventusi nuk shkoi më shumë se barazimi 1-1 në shtëpi ndaj Interit, në aktin e parë gjysmëfinal të Kupës së Italisë. Një duel tepër i tensionuar, teksa miqtë barazuan në minutën e 95-të, me penallti. Në lidhje me këtë sfidë foli edhe trajneri Masimiliano Alegri që për mikrofonin e “Mediaset” ndër të tjera deklaroi:“Djemtë janë shumë të zemëruar për këtë barazim, por duhet ta pranojmë për gabimet që bëmë. Ishim shumë të ngadaltë në pjesën e parë. Në pjesën e dytë i vumë më shumë presion dhe ndjesitë ishin të mira. Në futboll fatkeqësisht ndodhin edhe këto.
Vlahoviç luajti një ndeshje të mirë, por duhet ta mbushim zonën më mirë. Pastaj hyri Kieza dhe përdorëm zgjidhje të ndryshme. Unë jam i kënaqur me të dy, performuan mirë.
Kieza mund ta vendosë ndeshjen. Di Maria mund të jetë i zemëruar, por duhet të bëj zëvendësime bazuar në mënyrën se si shkon ndeshja. Ai nuk kishte luajtur për një kohë të gjatë dhe e hoqa për të futur një lojtar që vraponte më shumë.
Federiko po rritet në gjendje, dhimbjet janë ulur dhe ka hyrë më mirë. Duhet të rritet, në 40 paraqitje ka luajtur vetëm 900 minuta. Duhet rikuperuar gjendja dhe aspekti psikologjik, është normale. Vitin tjetër do të jetë më i gatshëm.“Fundi i ndeshjes? Nuk di asgjë, ndeshja kishte mbaruar dhe unë kisha hyrë brenda. Asgjë e madhe, vetëm pak konfuzion në fund të një ndeshje të ekuilibruar. Interi vinte nga një periudhë e vështirë, por është gjithmonë Inter. Ne përfunduam në rritje, por na vjen keq. Ndeshja kishte mbaruar dhe duhej të ishim më të shpejtë. Kostiç mund të kishte qenë më i ashpër duke iu afruar Dumfries, por rezultati është i drejtë”, deklaroi Alegri.