“Presioni ekziston gjith monë, jam ndier shumë keq për humbjen në Torino, por me drejtuesit kam një marrëdhënie të shkëlqyer”, ka qenë fjalia me të cilën Simone Inzagi ka nisur konferencën e tij pas ndeshjes me Bolonjën, ku arriti të marrë një fitore të vyer për klasifikimin dhe për moralin.
“Jam shumë i lumtur për rezultatin, e dija që do të bënim mirë, pasi kisha parë gjithë skuadrën tejet të përqendruar dhe të vendosur. Pas së dielës na duhej një reagim dhe e gjetëm në mënyrën më të mirë të mundshme.
Shënuan pesë lojtarë të ndryshëm dhe është një sinjal fantastik për skuadrën”, vazhdoi trajneri që u ndal edhe te renditja, individët dhe te transferta e radhës ndaj Atalantës.
RENDITJA – “Nuk e shikojmë klasifikimin dhe tashmë mendojmë vetëm për ta mbyllur në mënyrën më të mirë të mundshme. Çdo skuadër, përveç Napolit, po has probleme dhe pas pauzës do të shohim si do të na shkojë të gjithëve, të bëjmë llogaritë. Ekipi i Spaletit ka gjetur vazhdimësinë, është ajo që na mungon ne dhe që na ka penalizuar për të qenë në të njëjtat pozita me ata”.
INDIVIDËT – “Bisedova me Lautaron kur e zëvendësova, sepse doja ta pyesja mos kishte ndonjë problem te penalltia, por ai dhe Çalhanoglu kanë një raport të shkëlqyer. Pastaj po dëshmojmë edhe rikthimin e Brozoviçit që është shumë i rëndësishëm dhe do ta vlerësoj nëse do të luajë titullar ndaj Atalantës”.
ATALANTA – “Kemi disa përballje direkte, të cilat po i analizojmë pse po i humbasim, edhe pse duhet thënë që përveç Romës, të tjerat janë vendosur nga episode dhe nuk meritonim t’i humbnim. Do të bëjmë maksimumin, përballë një skuadre që po bën një kampionat shumë të mirë dhe që e dimë se nuk do ta kemi aspak të thjeshtë”.