UEFA do të zhvillojë nesër në Nion të Zvicrës shortin e fazës me eliminim direkt të turneve për klube që organizon, ku padyshim spikat ai i Ligës së Kampioneve. Dhe kureshtja më e madhe për këtë short ndoshta i përket emrit të rivalit të Bajern Mynih.
Sipas rregullores së turneut, skuadra bavareze ka vetëm 4 alternativa të mundshme në short për shkak të pranisë të tre ekipeve gjermane dhe të Interit në vazon e dytë, PSG, Liverpul, Milan dhe Klub Bryzh janë të vetmet skuadra me të cilat mund të përballet skuadra gjermane në turin tjetër të Champions.
Por drejtori sportiv i Bajernit, Hasan Salihamixhiç, mendon se ekipi i tij nuk duhet të nënvlerësojë asnjë prej ekipeve edhe pse të gjithë mendojnë se të shmangësh Liverpul e PSG në këtë fazë është shumë e rëndësishme.
“Nuk do të bëjmë gabimin që të mendojmë se Milani apo Bryzhi janë më pak të fortë se PSG apo Liverpuli. Është e qartë që kur dëgjon këto emra, gjithçka bëhet interesante. Vetëm nesër do të shohim se çfarë do të na takojë”, tha drejtuesi i Bajernit.