Në fund të ditës në futboll kanë rëndësi pikët e grumbulluara, por padyshim që mënyra si kanë ardhur këto pikë nuk mund të anashkalohet dhe janë statistikat e tjera që nxjerrin në pah pikat e forta dhe të dobëta të secilës skuadër.Duke u ndalur tek Interi, vërtet zikaltrit janë të dytët në Serinë A dhe po presin të luajnë sfidën e tyre në fazën e 1/8-ave ndaj Portos, por ka një të dhënë alarmante për ta, ajo e driblimeve.
Skuadra e Inzagit është e parafundit për driblimet e kryera në kampionat dhe po ashtu e parafundit nëse marrim në konsideratë fazën e grupeve të Champions League.
Në kampionat vetëm Kremoneze ka bërë më keq me 4.5 driblime për ndeshje kundrejt 4.6 të zikaltërve, një dobësi që nuk është e panjohur në Milano.
Interi e vuan prej disa sezonesh këtë dukuri, pasi edhe në vitin e titullit ishte skuadra që kishte realizuar më pak driblime, ndërsa vitin e shkuar e mbylli e treta nga fundi.
E njëjta situatë edhe në Champions League, ku vetëm Viktoria Plzen (4 driblime për ndeshje) bëri më keq se Interi në fazën e grupeve me 4.8. Një problem strukturor ky i Interit që nuk ka lojtarë të aftë për të kapërcyer kundërshtarët me Barelën e Lautaron si të vetmit fare të ekipit në këtë drejtim.