Një grua 96-vjeçare që punonte si sekretare për një komandant të kampit nazist të përqendrimit është kapur disa orë pasi u arratis nga shtëpia e saj e kujdesit dhe humbi fillimin e gjyqit të saj në Gjermaninë veriore.
Irmgard Furchner, e cila ishte 18 vjeç kur filloi punën në kampin Stutthof në bregdetin Baltik në Poloninë e pushtuar nga nazistët, do të dilte në gjyq të enjten me akuzën e ndihmës dhe nxitjes së vrasjes së mijëra të burgosurve.
Sipas Guardian, pasi ajo nuk u shfaq në gjyq, zëdhënësja e gjykatës tha se ndaj saj ishte lëshuar një urdhër arresti.
“Ajo u largua nga shtëpia herët në mëngjes me një taksi në drejtim të një stacioni të metrosë,” tha Frederike Milhoffer.
Furchner nuk ia doli mbanë. Të enjten pasdite, Milhoffer njoftoi se ishte kapur dhe se një mjek po vlerësonte nëse shëndeti i saj do ta lejonte atë të mbahej në paraburgim. Akuzat nuk mund të lexohen nëse Furchner, e cila përballet me gjyqin në gjykatën për të mitur për shkak të moshës së saj të re në kohën e krimeve të supozuara, nuk është e pranishme në gjykatë personalisht. Seanca e radhës është caktuar për më 19 tetor.
Të mbijetuarit e Holokaustit, disa prej të cilëve u burgosën në kampin që ishte afër qytetit port Gdansk, duhej të dilnin në gjyq në gjykatën e rrethit Itzehoe, afër Quickborn, në veri të Hamburgut, për të dhënë dëshmi në lidhje me përvojat e tyre. Furchner akuzohet për ndihmë dhe nxitje të vrasjes në 11,412 raste, si dhe bashkëpunim në 18 raste të tentativës së vrasjes. Ajo është gruaja e parë që del në gjyq në dekada për krimet e lidhura me Rajhun e Tretë.
Çështja e prokurorisë kundër saj po ngrihet si rezultat i gjykimit të John Demjanjuk, një ish-roje kampi në kampin e përqendrimit Sobibor, i cili në vitin 2011 u dënua për ndihmë dhe nxitje të vrasjeve të 28,000 njerëzve, duke vendosur një precedent të ri ligjor. Gjykatësi në atë kohë tha se pavarësisht se sa i vogël ishte roli i një personi, për sa kohë që mund të vërtetohej se ata kishin qenë “protagonist” në “makinerinë e shkatërrimit”, ata mund të mbaheshin përgjegjës për krimet e kryera.