Tërmet me magnitudë 4.1 trondit Fushë-Krujën dhe zonat përreth/ Banorët në panik, nuk raportohet për dëme
Një tërmet me magnitudë 4.1 të shkallës Rihter është ndjerë në orët e para të mëngjesit të sotëm, 24 qershor 2025, duke tronditur zonën e Fushë-Krujës, Durrësit dhe Tiranës. Sipas të dhënave paraprake, epiqendra është regjistruar pranë Shijakut, shumë afër Fushë-Krujës, me një thellësi prej rreth 10 kilometrash.
Lëkundja është ndjerë fuqishëm në Fushë-Krujë, ku banorët janë zgjuar në panik dhe kanë dalë jashtë banesave. Disa familje kanë qëndruar për disa minuta në oborre dhe rrugë, ndërsa po verifikohej situata.
Fatmirësisht, nuk ka raportime për dëme materiale apo viktima, por strukturat e mbrojtjes civile dhe bashkia e Fushë-Krujës janë vënë në lëvizje për të kontrolluar zonat më të ndjeshme.
Shqipëria është një vend me aktivitet të lartë sizmik dhe Fushë-Kruja, si pjesë e zonës së qendrës perëndimore, ka përjetuar më parë lëkundje të ngjashme, sidomos pas tërmetit shkatërrues të vitit 2019.