Prej 24 orësh, Egert Vargu agjent doganor në Portin e Durrësit është në qelitë e paraburgimit në Durrës, për 45 kilogramë kokainë që u kap në një anije vinte nga Brazili.
Por veç punës si agjent doganor, Vargu është edhe këshilltar bashkiak në Bashkinë e Tiranës, i zgjedhur nga Partia Socialiste në 30 Qershor të 2019.
Një i njohur i tij tregoi për Lapsi.al se posti si këshilltar bashkiak ishte kurorëzim i një karriere disavjeçare në Partinë Socialiste për Vargun. Fillimisht si drejtues i një Organizate Socialiste për të vazhduar më tej si “I deleguar” dhe më pas si Koordinator i Përgjithshëm Elektoral në Njësinë nr.8.
Një foto e tij me ish kreun e Partisë Socialiste të Tiranës, Edvin Bushati, qarkulloi menjëherë pas arrestimit në mediat sociale.
Si një socialist i angazhuar në aktivitetet e përditshme politike, Vargu ka mbajtur disa pozicione në administratë që prej vitit 2018. Ai ka qenë shef sektori në Inspektoriatin Shtetëror Teknik, shef sektori edhe në Drejtorinë e Taksave, ku ka punuar në terren dhe njësoj shef sektori, edhe në KESH.
Katapultimi si Këshilltar Bashkiak në Tiranë u shoqërua me postin e anëtarit të Komisionit për Buxhetin për t’u promovuar më tej, si agjent doganor në Portin e Durrësit.
Por me operacionin ku u kapën 45 kilogramë, karriera e Vargut mori një goditje të fortë.
Burime nga policia e Durrësit thanë se menjëherë pas arrestimit ai mohoi të kishte dijeni për kokainën që u kap në anijen nga Brazili. Megjithëse ka qenë i kontraktuar nga kompania “Apetit Group”, administratori i së cilës Arben Ferizi u vu edhe në pranga.
Në media sot doli edhe një foto e Egert Vargut me kryetarin e Bashkisë Erion Veliaj.
Por ndërsa kanë kaluar 24 orë nga arrestimi i një Këshilltari Bashkiak për një çështje serioze si ajo e trafikut ndërkombëtar të kokainës, Bashkia e Tiranës ka heshtur.
Ç’është e vërteta, nivelet e larta të qeverisë Rama kanë kaluar raste të ngjashme, kur deputetë, kryebashkiakë apo zyrtarë të lartë janë përfshirë në trafik droge, shfrytëzim të prostitucionit, skandale seksuale etj, por për Bashkinë e Tiranës kjo është një eksperiencë e re.
Veliaj duket të jetë kapur gafil, por përgjegjësia politike dhe morale e detyron të japë një shpjegim, të marrë një vendim dhe të mbajë një qëndrim për Egert Vargun.
A e kontrolloi figurën e tij, kur e përzgjodhi si kandidat për Këshillin Bashkiak? Si ka qenë performanca e këtij këshilltari në vitet e shkuara në Bashkinë e Tiranës? Çfarë qëndrimi mban sot kryetari i Bashkisë Erion Veliaj për këshilltarin e arrestuar?
Në të shkuarën, kryeministri Rama ka bërë disa deklarata të nxituara mbi socialistët e implikuar në krime të rënda. Së fundmi qarkulloi vlerësimi që ai kishte për Agim Kajmakun, të cilin e konsideronte një njeri “që nuk kishe marrë asnjë gjobë në jetën e tij”.
Gjasat janë që Bashkia të tentojë ta kalojë në harresë këtë histori, e ndihmuar edhe nga kontrolli strikt që Veliaj ka mbi mediat, deri kur pozicioni i Vargut në trafikun e kokainës të sqarohet plotësisht. Për socialistët ky është skandali i dytë brenda pak ditësh, kur u arrestua ish-kryebashkiaku i Vorës, Agim Kajmaku.